მოჩვენებები, ავი სულები, მარსელები, ურჩხულები და საშიში პერსონაჟები – ეს ტიმ ბარტონის შემოქმედების ნაწილია. მისი განსხვავებული და დასამახსოვრებელი პერსონაჟები ახლა ჰელოუინისთვის ლონდონის დიზაინის მუზეუმშია გამოფენილი.
გამოფენის, სახელწოდებით „ტიმ ბარტონის სამყარო“, მიზანია, ტიმ ბარტონი წარმოაჩინოს როგორც კინორეჟისორი, ისე მხატვარი. მან ხატვა ბავშვობაში, 1960-იან წლებში, დაიწყო. ახლაც კი, ათწლეულებისა და ისეთი წარმატებული ფილმების შემდეგ, როგორებიცაა „ედვარდ მაკრატელხელება“, „ბეტმენი“, „კოშმარი შობის წინ“ და „ბიტლჯუსი“, თავის იდეებს ჯერ ფანქრით გამოსახავს.
გამოფენაზე კინოსტუდიების კოლექციებიდან და პირადი არქივიდან 600 ნივთია წარმოდგენილი. ლონდონის დიზაინის მუზეუმში ტიმ ბარტონის ჩანახატების, ქანდაკებების, ნახატების, კოსტიუმების დიზაინისა და თავად ფილმის რეკვიზიტების ნახვაა შესაძლებელი.
ლონდონი ბოლო ქალაქია, სადაც გამოფენა „ტიმ ბარტონის სამყარო“ იმართება. გამოფენის ფარგლებში რეჟისორის შემოქმედება ათწლეულის განმავლობაში 11 ქვეყანასა და 14 ქალაქში იყო წარმოდგენილი. გამოფენის კურატორის მარია მაკლინტოკის თქმით, გამოფენა ბარტონის საყვარელ ქალაქში სრულდება.
„გამოფენა ტიმის განვლილ შემოქმედებით გზას მოიცავს, კალიფორნიის გარეუბანში მისი ბავშვობით დაწყებული კინოინდუსტრიაში გაწეული მუშაობით დამთავრებული. ამ დროში მოგზაურობისას უკეთ ვეცნობით ტიმს, როგორც შემოქმედებით და ნიჭიერ მხატვარს, მოქანდაკეს. ჩვენ თვალს ვადევნებთ, როგორ გადადის მისი იდეები ფილმებში. რა თქმა უნდა, ტიმმა უამრავ გასაოცარ და განსხვავებულ ფილმზე იმუშავა. შესაბამისად, გამოფენა ტიმის როგორც კინორეჟისორის, ისე მხატვრის შემოქმედებას წარმოაჩენს“, – ამბობს გამოფენის კურატორი მარია მაკლინტოკი.
ასობით ნახატთან ერთად გამოფენაზე წარმოდგენილია რეკვიზიტები, თოჯინები, დეკორაციები და კოსტიუმები ყველასთვის ცნობილი ფილმებიდან, მათ შორისაა „ედვარდ მაკრატელხელებადან“ ჯონი დეპისა და „ბეტმენიდან“ მიშელ ფაიფერის კოსტიუმები.
