10 თებერვალს ევროკომისიამ ევროპარლამენტში კიბერშევიწროების წინააღმდეგ სამოქმედო გეგმა წარადგინა, რომელიც მიზნად ისახავს ახალგაზრდა მსხვერპლთა დახმარებას, ძალადობის შესახებ შეტყობინებასა და მხარდაჭერის გაწევას.
გეგმის ნაწილია სპეციალური აპლიკაციის შექმნა, რომელიც ბავშვებს საშუალებას მისცემს ჩაგვრის შესახებ კონფიდენციურად აცნობონ სპეციალურ ცხელ ხაზს, უსაფრთხოდ შეინახონ და გააგზავნონ მტკიცებულებები, შემდეგ კი მიიღონ დახმარება სამართალდაცველი ან სხვა შესაბამისი უწყებისგან.
„ჩვენ გვსურს, რომ ევროკავშირის მასშტაბით ბავშვები და ახალგაზრდები თანაბრად იყვნენ დაცული. ვიაზრებთ კიბერშევიწროების საფრთხეს, ამიტომ მოვუწოდებთ ყველა წევრ სახელმწიფოს შეიმუშაონ კიბერშევიწროების თანმიმდევრული ეროვნული პოლიტიკა. ჩვენ უზრუნველვყოფთ, რომ ყველა შესაბამისი ინსტრუმენტი შეესაბამებოდეს კიბერშევიწროების წინააღმდეგ ბრძოლას, რომლის დროსაც უახლეს ტექნოლოგიებს გამოვიყენებთ“, — აცხადებს ტექნოლოგიური სუვერენიტეტის, უსაფრთხოებისა და დემოკრატიის საკითხებში ევროპული კომისიის აღმასრულებელი ვიცე-პრეზიდენტი, ჰენა ვირკუნენი.
აპლიკაციის შეთავაზების გარდა, გეგმა ითვალისწინებს ევროკავშირის არსებული კანონმდებლობის მიზნობრივ აღსრულებას, რათა შემცირდეს ჩაგვრის შემთხვევები.
ეს გულისხმობს ციფრული სერვისების შესახებ კანონის ფარგლებში წესების გამკაცრებას მავნე ინფორმაციისგან არასრულწლოვნების დასაცავად და ხელოვნური ინტელექტის შესახებ კანონის მიზნობრივ აღსრულებას.
