„სლოვაკეთს ენერგორესურსებით ვერ დააშანტაჟებთ“, — განაცხადა ქვეყნის პრემიერ-მინისტრმა, რობერტ ფიცო-მ და თქვა ისიც, რომ დრუჟბის ნავთობსადენი-სა და მისი მეშვეობით რუსული ნავთობის ტრანზიტის აღდგენასთან დაკავშირებით ურსულა ფონ დერ ლაიენი-სთან საერთო შეხედულებას იზიარებს.
პარიზის ბირთვული ენერგიის სამიტი-ს ფარგლებში გამართულ შეხვედრაზე, რობერტ ფიცოს თქმით, მან ევროკომისიის პრეზიდენტს წარუდგინა ყველა ის არგუმენტი, რომლის მიხედვითაც დაარწმუნა იგი „დრუჟბის“ მილსადენის შეკეთების საჭიროებაში.
„მქონდა შესაძლებლობა, გავსაუბრებოდი ევროკომისიის პრეზიდენტს საკითხებზე, რომლებიც კრიტიკულად მნიშვნელოვანია სლოვაკეთისთვის. განვიხილეთ უკრაინის გავლით სლოვაკეთში რუსული ნავთობის მიწოდების აღდგენის საჭიროება.
მოხარული ვარ, რომ ამ საკითხზე ევროკომისიასთან საერთო ხედვა გაგვაჩნია. დაშვებული გამონაკლისების საფუძველზე, სლოვაკეთს აქვს უფლება მიიღოს რუსული ნავთობი არა მხოლოდ „დრუჟბის“ ნავთობსადენით, არამედ ზღვითაც. ამის მიუხედავად, ამ შემთხვევაში ჩვენ პრობლემას ვეჩეხებით ჩვენს ხორვატ პარტნიორებთან, თუმცა დარწმუნებული ვარ, ეს მოგვარებადი საკითხია.
ევროკომისიის პრეზიდენტს ვაჩვენე თანამგზავრით გადაღებული სურათები, რაც ადასტურებს, რომ „დრუჟბის“ ნავთობსადენი უკრაინის ტერიტორიაზე დაზიანებული არ არის და რომ ეს არის უკრაინის პრეზიდენტ ვოლოდიმირ ზელენსკი-ს თვითნებური გადაწყვეტილება — შეეწყვიტა ნავთობის ნაკადი, რამაც დაგვაზიანა ისევე, როგორც ეს ბუნებრივი აირის შემთხვევაში მოხდა.
შევთანხმდით, რომ „დრუჟბის“ მილსადენით ნავთობის ტრანზიტი უნდა აღდგეს. თუკი მილსადენი იყო დაზიანებული, მოვითხოვთ მის შეკეთებას. სლოვაკეთი მზად არის საკუთარი სარემონტო შესაძლებლობების შეთავაზებისთვის.
თავის მხრივ, ევროკომისიაც მზად არის, საჭიროების შემთხვევაში, არამხოლოდ უზრუნველყოს დახმარება საკუთარი შესაძლებლობების ფარგლებში, არამედ დააფინანსოს სარემონტო სამუშაოებიც“, — განაცხადა სლოვაკეთის პრემიერ-მინისტრმა, რობერტ ფიცომ.
თავის მხრივ, პლატფორმა X (ყოფილი Twitter)-ზე შეხვედრის შესახებ დაწერა ევროკომისიის პრეზიდენტმაც, თუმცა რობერტ ფიცოსგან განსხვავებით, ურსულა ფონ დერ ლაიენს საერთოდ არ უხსენებია „დრუჟბის“ მილსადენთან დაკავშირებული შეთანხმება:
„განვიხილეთ ენერგორესურსებზე ევროპელებისთვის ხელმისაწვდომი ფასების საკითხი, სლოვაკეთისა და ევროკავშირისთვის უსაფრთხო მიწოდების შენარჩუნებით. ჩვენი ენერგოუსაფრთხოება საფრთხის ქვეშაა.
ასევე განვიხილეთ NextGenerationEU-ს დანერგვა და ის ნაბიჯები, რომლებიც აუცილებელია, მათ შორის მართლმსაჯულების სფეროში, რათა სლოვაკეთმა მაქსიმალურად ისარგებლოს ამ ინვესტიციებით.“
მილსადენი, რომლითაც უკრაინის ტერიტორიის გავლით რუსული ნავთობი სლოვაკეთსა და უნგრეთს მიეწოდება, რუსული უპილოტო საფრენი აპარატის იერიშის შედეგად იანვრის ბოლოს დაზიანდა.
„დრუჟბის“ სახელწოდების მქონე მილსადენმა ტრანზიტულ და რუსული ნედლეულის მიმღებ სახელმწიფოებს შორის დიპლომატიური უთანხმოება გამოიწვია.
ბრატისლავა და ბუდაპეშტი ამტკიცებენ, რომ ის მუშა მდგომარეობაშია და კიევს ბრალს სდებენ საკითხის პოლიტიკური შანტაჟის მექანიზმად გამოყენებაში.
ევროკომისია-მ უკრაინას მოუწოდა, დააჩქაროს აღდგენითი სამუშაოები, თუმცა ქვეყნის პრეზიდენტი ვოლოდიმირ ზელენსკი ამბობს, რომ დაზიანებული ნავთობსადენის „სურვილი დიდად არ აქვს“ და რომ ეს გარკვეულწილად დამოკიდებულია ცეცხლის შეწყვეტის შეთანხმების არსებობაზე.
შექმნილმა მდგომარეობამ ევროკავშირის ორი წევრი ქვეყნის ხელისუფლებები უკრაინის საწინააღმდეგოდ განაწყო. ეს, მათ შორის, გამოიხატება კიევისთვის 90 მილიარდი ევროს ოდენობის სესხის დაბლოკვითაც