ევროკომისიამ ჩინური სწრაფი მოდის ონლაინგიგანტის, Shein-ის, წინააღმდეგ ფორმალური გამოძიება დაიწყო.
გამოძიება ციფრული სერვისების აქტის ფარგლებში გამოვლენილ სამ კონკრეტულ დარღვევას ეფუძნება. მათ შორისაა იარაღისა და ბავშვთა სექსუალურ ძალადობასთან დაკავშირებული თოჯინების პლატფორმაზე გაყიდვა, მარკეტინგულ დიზაინში ისეთი ტექნიკების გამოყენება, რომლებიც დამოკიდებულებას იწვევს და მომხმარებელს პლატფორმაზე უფრო დიდი დროის გატარებისკენ უბიძგებს. კიდევ ერთი შესაძლო დარღვევა გამჭვირვალობის ნაკლებობას უკავშირდება — კერძოდ, იმას, თუ როგორ უწევს პლატფორმა მომხმარებელს კონკრეტული პროდუქტების რეკომენდაციას.
„სტატისტიკის თანახმად, Shein ევროკავშირში 145 მილიონ მომხმარებელს აღწევს. ე.წ. საიდუმლო შოპინგის გზით გამოვლინდა 3 წლამდე ბავშვებისთვის განკუთვნილი 27 პროდუქტი, რომლებიც ევროკავშირის კანონმდებლობასთან სრულიად შეუთავსებელია.
ასევე საყურადღებოა დამოკიდებულების გამომწვევი ტექნიკების გამოყენება, რომლებიც არასრულწლოვანებზე მოქმედებს, რადგან პლატფორმების უმრავლესობაზე 13 წლის ზემოთ მყოფი პირები უკვე დაშვებულნი არიან. კითხვა იმაშია, გააანალიზა თუ არა ეს რისკები კომპანიამ. პირველადი პასუხებიდან ჩანს, რომ Shein-ს ეს რისკები არ შეუფასებია. გზავნილი ძალიან მკაფიოა — კომპანიამ უნდა გააანალიზოს ის რისკები, რომლებსაც ევროკავშირის მომხმარებლებს უქმნის, და ეს რისკები უნდა შემცირდეს. ჩვენ ჩავატარებთ სიღრმისეულ გამოძიებას და მოვუწოდებთ კომპანიას, ითანამშრომლოს ამ პროცესში“, — განაცხადა ევროკომისიის პრესსპიკერმა, ტომა რენიემ.
სიღრმისეული გამოძიების ფარგლებში შესაძლოა დამატებითი ინფორმაციის გამოთხოვა, დაკითხვები და მონიტორინგის სისტემების ამოქმედებაც იგულისხმებოდეს. თუ კომპანიას ბრალდებები დაუდასტურდა, ბრიუსელს შეეძლება დაუწესოს მას დროებითი ზომები, დააკისროს კონკრეტული ვალდებულებები ან გამოიტანოს გადაწყვეტილება მოთხოვნების შეუსრულებლობის საფუძველზე, რაც შესაძლოა ფულად ჯარიმებსაც მოიცავდეს.
Urine News-თან ინტერვიუში კომპანია Shein-მა განაცხადა, რომ სერიოზულად ეკიდება ციფრული სერვისების აქტის ფარგლებში დაკისრებულ ვალდებულებებს და აღნიშნა, რომ ევროკომისიასთან ყოველთვის თანამშრომლობდა.
