ევროკავშირის ყოფილმა უმაღლესმა წარმომადგენელმა, ფედერიკა მოგერინიმ ევროპის კოლეჯის რექტორის თანამდებობა დატოვა მას შემდეგ, რაც ის ევროკავშირის საზოგადოებრივი პროკურატურის ოფისის მიერ დაწყებული გამოძიების ფარგლებში თაღლითობასა და კორუფციაში დაადანაშაულეს.
მოგერინი ამ დაწესებულების რექტორის თანამდებობას 2020 წლიდან იკავებდა.
„ყველაზე მკაცრი და სამართლიანი დამოკიდებულების თანახმად, რომლითაც ყოველთვის ვასრულებდი ჩემს მოვალეობებს, დღეს გადავწყვიტე ევროპის კოლეჯის რექტორისა და ევროკავშირის დიპლომატიური აკადემიის დირექტორის თანამდებობიდან გადავდგე“, – წერს მოგერინი ევრონიუსის მიერ მოძიებულ იმეილში.
მოგერინი სამ ეჭვმიტანილს შორის იყო, რომლებიც 2 დეკემბერს დილით დაკითხვაზე დაიბარეს მას შემდეგ, რაც ბელგიის ხელისუფლებამ ევროკავშირის საგარეო ქმედებათა სამსახურის ოფისებში, ასევე ქალაქ ბრიუგეში ევროპის კოლეჯსა და კერძო სახლებში ჩხრეკა ჩაატარა. გამოძიება უკავშირდება ევროკავშირის დაფინანსებით ახალგაზრდა დიპლომატების მომზადებას.
პროკურატურის ცნობით, საქმე ეხება ტენდერს, რომელშიც 2021–2022 წლებში ევროკავშირის საგარეო ქმედებათა სამსახურმა ევროპის კოლეჯი შეარჩია. პროკურორები ახლა ცდილობენ დაადგინონ, პროექტისთვის გამარჯვებულის სტატუსის ოფიციალურად მინიჭებამდე დაარღვია თუ არა ევროკავშირის საგარეო საქმეთა სამინისტრომ ტენდერის წესები კოლეჯისთვის ინფორმაციის გაზიარებით.
