ფოტო არქივიდან
საპროტესტო აქციების დროს ჯგუფური ძალადობის ორგანიზებასა და მასში მონაწილეობის ბრალდებით დაკავებული 8 პირის მორიგი სასამართლო სხდომა გაიმართა. დღევანდელ პროცესზე პროკურატურის ორი მოწმე, გამომძიებელი გენადი იოსებაშვილი და ამ საქმეში დაზარალებულის სტატუსის მქონე პოლიციელი გიორგი ჯანიკაშვილი, დაკითხეს. გამომძიებელმა მის მიერ ნანახ ვიდეოზე ისაუბრა და თქვა, რომ მასში ერთ-ერთი ბრალდებული, ინსაფ ალიევი მონაწილეობდა და ის სამართალდამცველების მიმართულებით ქვას ისროდა.
„ინსაფ ალიევთან მიმართებაში წარმოდგენილია მხოლოდ 2 ვიდეოჩანაწერი. ერთი იყო დღეს, ერთი კი აქამდე იყო გამოკვლეული. ორივე ვიდეოჩანაწერში ფაქტობრივად არ ვლინდება რაიმე სახის, თუნდაც, მიმანიშნებელი შორიდანაც კი, რაიმე სახის გარემოება, ფაქტობრივი მოცემულობა, რომ ინსაფ ალიევი მოქმედებდა, მონაწილეობდა რაიმე სახის ჯგუფურ ძალადობასა ან ქმედებაში”, – განაცხადა ადვოკატმა აიჰან ჰასანლიმ.
გამომძიებლის გენადი იოსებაშვილის შემდეგ სხდომათა დარბაზში მოწმე, პოლიციელი გიორგი ჯანიკაშვილი დაკითხეს, რომელსაც ამ საქმეში დაზარალებულის სტატუსი აქვს. ის გამოჰკითხეს საპროტესტო აქციებისას დაკავებული 11 პირის საქმეზეც, რომელშიც ასევე დაზარალებულად არის ცნობილი.
მოწმე პოლიციელმა გიორგი ჯანიკაშვილმა განაცხადა, რომ მას საპროტესტო აქციაზე დემონსტრანტების მხრიდან ნასროლი ქვა თავში მოხვდა, თუმცა მან აგრეთვე ისიც თქვა, რომ არ იცის ქვა კონკრეტულად ვინ ესროლა. როგორც დაცვის მხარე ამბობს, ბრალდების მხარის მიერ წარმოდგენილი მოწმეებისგან ვერცერთმა ვერ დაადასტურა რომელიმე დაკავებულის ბრალეულობა.
„დღეს ბრალდების მხარემ წარმოადგინა ორი მოწმე, წარმოდგენილი მოწმეების ჩვენებები არ იყო კონკრეტული, არ იყო დამადასტურებელი იმ ბრალეულობის, რაზეც ზვიად ცეცხლაძეს ბრალი აქვს წარდგენილი.
ეს მოწმე 29 ნოემბერს დაშავდა, არ იცოდა ვის მიერ. მან ასევე ისიც ვერ გამორიცხა, აქციის მონაწილემ დააზიანა, თუ წარსულში საპოლიციო პრაქტიკის მანძილზეა დაშავებული.
ამ მოწმის ჩვენებით ვერ დადასტურდა ვერც ერთი გარემოება, რომ კონკრეტულად ზვიად ცეცხლაძემ და სხვა დანარჩენმა პირებმა ის დააზიანეს. მან ასევე ვერ დაადასტურა, როგორი ფორმით ხდებოდა აქციის ორგანიზება, არ მოუსმენია განცხადებები, მოწოდებები, მითითებები, თუ როგორ უნდა ემოქმედათ აქციის მონაწილეებს.
მან დაადასტურა, რომ აქციაზე ყველა თვითნებურად და დამოუკიდებლად მოქმედებდა, შესაბამისად, ეს გარემოება ვფიქრობთ, რომ არის პირდაპირ მიმანიშნებელი იმისა, კონკრეტული მოწმეები ვერ ასახელებენ კონკრეტულ ფაქტებს, კონკრეტულ მტკიცებულებებსა და კონკრეტულ არგუმენტებს, თუ რის საფუძველზე უნდა მოხდეს კონკრეტული პირების ბრალდება”, – განაცხადა ადვოკატმა დავით ჭიკაიძემ.
მედიას კი დღესაც, 14 ივლისსაც, არ ჰქონდა შესაძლებლობა პროცესი გადაეღო. საერთო სასამართლოების შესახებ კანონში შესული ცვლილებების თანახმად, ახლა სასამართლო პროცესების გადაღებაზე ნებართვას მედიას იუსტიციის უმაღლესი საბჭო აძლევს, თუმცა ჟურნალისტებს საბჭოსგან სხდომის გადაღებაზე ნებართვასთან დაკავშირებით პასუხი კიდევ არ მიუღიათ.
