პორტუგალიის რიგგარეშე საპარლამენტო არჩევნებში მმართველი პარტია “დემოკრატიული ალიანსი” ლიდერობს.
მიუხედავად ამისა, პოლიტიკურმა გაერთიანებამ პარლამენტში უმრავლესობის მოპოვება ვერ შეძლო, რაც იმას ნიშნავს, რომ მმართველ პარტიას კოალიციის შექმნის მიზნით პოლიტიკური მოლაპარაკებების დაწყება მოუწევს.
ეგზიტპოლების მიხედვით, „დემოკრატიულ ალიანსს” პორტუგალიელი ამომრჩევლის 29-დან 34-მდე პროცენტმა მისცა ხმა. მათი მთავარი დაპირება „ინვესტიციების სტიმულირება“ და „სამართლიანობის დამკვიდრება” იყო. რიგგარეშე არჩევნებში 26%-მდე მხარდაჭერა მოიპოვა „სოციალისტურმა პარტიამ”. ულტრამემარჯვენე პარტიამ სახელწოდებით „ჩეგა“ ამომრჩევლის 20%-იანი მხარდაჭერის მოპოვება შეძლო, რაც მათთვის მნიშვნელოვანი შედეგია.
რიგგარეშე არჩევნები პორტუგალიაში 18 მაისს ქვეყანაში შექმნილი პოლიტიკური კრიზისის ფონზე გაიმართა. ბოლო 3 წელიწადში ეს უკვე მესამე საპარლამენტო არჩევნებია ქვეყანაში.
