ესპანეთი, პორტუგალია და საფრანგეთის დიდი ნაწილი ელექტროენერგიის გარეშე დარჩა.
უკვე რამდენიმე საათია, მილიონობით მოქალაქეს არ აქვს წვდომა საბანკო ტერმინალებთან, შეფერხებით მუშაობს მობილური ქსელი, ინტერნეტი და სატრანსპორტო სისტემა.
ენერგოპრობლემების გამო მუშაობა შეწყვიტეს მადრიდისა და ლისაბონის საერთაშორისო აეროპორტებმა. გაუქმებულია ასობით ავიარეისი. ესპანეთისა და პორტუგალიის დედაქალაქებში გაჩერებულია რკინიგზა, ასევე ადგილობრივი მეტროპოლიტენები. ზოგიერთი მეტროსადგური დაიხურა. მატარებლები გვირაბებშია გაჩერებული და მიმდინარეობს მგზავრთა ევაკუაცია.
ელექტროენერგიის შეწყვეტამ მნიშვნელოვნად შეაფერხა სამედიცინო დაწესებულებების მუშაობა. გადაუდებელი ოპერაციებისთვის ელექტროენერგიას საავადმყოფოების უმრავლესობას სპეციალური გენერატორებით აწვდიან.
ადგილობრივი ხელისუფლება მოუწოდებს მოქალაქეებს, სატელეფონო ხაზების გადატვირთვის თავიდან ასაცილებლად არ დარეკონ გადაუდებელი დახმარების ცხელ ხაზზე (112) განსაკუთრებული აუცილებლობის გარეშე.
ამ დრომდე უცნობია, რის გამო დარჩა მილიონობით მოქალაქე ელექტრომომარაგების გარეშე. ჯერ არც ის არის ცნობილი, როდის აღდგება ელექტროენერგიის მიწოდება. ესპანეთსა და პორტუგალიაში აცხადებენ, რომ გენერატორებითაც კი დენით მომარაგება საკმარისი მხოლოდ 8-დან 12 საათის განმავლობაშია შესაძლებელი.
