კრემლიდან გაძლიერებული ბირთვული რიტორიკის ფონზე ჩრდილოატლანტიკური ალიანსი ორშაბათიდან ბირთვულ წვრთნებს იწყებს. ამის შესახებ ნატოს გენერალურმა მდივანმა მარკ რუტემ ლონდონში პრემიერ-მინისტრ კირ სტარმერსა და უკრაინის პრეზიდენტთან შეხვედრის შემდეგ განაცხადა.
ოფიციალური ცნობებით, წვრთნებში მონაწილეობას მიიღებს F-35A საბრძოლო თვითმფრინავები და B-52 ბომბდამშენები, ასევე 13 ქვეყნის 60 საჰაერო ხომალდი.
„არასტაბილურ სამყაროში სასიცოცხლოდ მნიშვნელოვანია, გამოვცადოთ და გავაძლიეროთ ჩვენი თავდაცვა, რადგან მოწინააღმდეგეებმა იცოდნენ, რომ ნატო მზად არის, უპასუხოს ნებისმიერ საფრთხეს”, – განაცხადა მარკ რუტემ.
ყოველწლიური ბირთვული წვრთნები ორშაბათს დაიწყება და ორ კვირას გასტანს.
