თურქეთის სახელმწიფო საინფორმაციო სააგენტოს მიერ გავრცელებული განცხადებით, გაკვეთის წინასწარი დასკვნის მიხედვით, თურქულ-გერმანული ოჯახის ოთხი წევრი, რომლებიც სტამბოლში დასვენების დროს გარდაიცვალნენ, სავარაუდოდ, სასტუმროში მწერების საწინააღმდეგო პესტიციდით მოიწამლნენ.
ბოჯეკების ოჯახი სტამბოლში გერმანიიდან ჩავიდა და ფათიჰის რაიონში მდებარე სასტუმროში დაბინავდა. 12 ნოემბერს ისინი შეუძლოდ გახდნენ და საავადმყოფოს მიმართეს, საიდანაც შემდეგ კვლავ სასტუმროში დაბრუნდნენ. მომდევნო დღეს ისინი კვლავ შეუძლოდ გახდნენ, თუმცა ამჯერად ისინი საავადმყოფოში სასწრაფო დახმარების მანქანით გადაიყვანეს. ბავშვები – 6 წლის ქადირ მუჰამეთი და 3 წლის მასალი – იმავე დღეს გარდაიცვალნენ. მათი დედა, ციგდემი, 14 ნოემბერს დაიღუპა, ხოლო მამა, სერვეტი, 17 ნოემბერს. ინციდენტმა სასტუმროს უსაფრთხოების სტანდარტებთან დაკავშირებით შეშფოთება გამოიწვია და მკაცრი ზედამხედველობისკენ მოწოდებები გააძლიერა…
Anadolu-ს სააგენტოს ცნობით, პროკურატურისთვის წარდგენილ წინასწარ დასკვნაში დადგინდა, რომ პირსახოცებზე, ნიღბებსა და სასტუმროს ნომრის სხვადასხვა ნაწილიდან აღებულ ნიმუშებზე ფოსფინის გაზი აღმოჩნდა. გაკვეთამ ასევე დაადასტურა, რომ ოჯახი საკვებით არ მოწამლულა, რაც გამორიცხავს თავდაპირველ ვერსიას ქუჩაში საკვებით მოწამვლის თაობაზე. Anadolu-ს ცნობით, გულისრევა და ღებინება აღენიშნებოდა სასტუმროში დარჩენილ კიდევ ორ ტურისტს, რომლებიც ასევე საავადმყოფოში გადაიყვანეს. ხელისუფლებამ ამ საქმესთან დაკავშირებით 11 ადამიანი დააკავა, სასტუმრო კი დაიხურა.
