საერთაშორისო სავალუტო ფონდის მმართველი დირექტორი კრისტალინა გეორგიევა ევროკავშირს მოუწოდებს, რომ ერთიანი და მტკიცე ხელით აღასრულოს მარიო დრაგის ანგარიშში მოცემული რეკომენდაციები. თუ ასე არ მოხდა, გეორგიევას აზრით, არსებობს საფრთხე, რომ ევრობლოკისთვის „ეგზისტენციალურ მომენტში“ ევროპამ ძვირფასი დრო დაკარგოს.
მარია ტადეო, ევრონიუსი: „მინდა იმ კაცის შეფასებით დავიწყო, რომელსაც, როგორც ამბობენ, დღეს ჭკუა ეკითხება ევროპაში და ეს კაცი არის მარიო დრაგი. მან განაცხადა, რომ ახლა ევროპას ეგზისტენციალური დრო უდგას. როდესაც ევროპას უყურებ, და ახლა ჩვენ ევროპაში ვიმყოფებით, მართლაც ხედავთ ეგზისტენციალურ პრობლემას? მართალია დრაგი?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „მართალია. ამ სწრაფად ცვალებად სამყაროში ნელი სვლა ჩამორჩენას ნიშნავს. ევროპა კი ნელა აერთიანებს ბაზარს. ევროპული პროექტი მართლაც ფანტასტიკური რამ არის. მეოცე საუკუნის საუკეთესო გამოგონება ევროპის ერთიან ძრავაზე გადაყვანა იყო. მაგრამ ახლა ვხედავთ, რომ ეს ძრავა შენელდა. როდესაც დრაგის ანგარიშს ვკითხულობთ, სავსებით ცხადია, რა უნდა გაკეთდეს. წინა პლანზე წამოწეულია პრიორიტეტები. ევროპის კონკურენტუნარიანობის აღსადგენად ოთხი პუნქტი შევიმუშავეთ: ერთი ის, რომ შეიქმნას 28-ე რეჟიმი კომპანიებისთვის. რატომ? იმიტომ, რომ კომპანიებმა სხვადასხვა ქვყანაში დარეგისტრირება ერთი და იმავე წესის მიხედვით შეძლონ. მეორე ის, რომ უნდა დასრულდეს საბანკო კავშირისა და კაპიტალის ბაზრების კავშირის შექმნა. რატომ? იმიტომ, რომ თუ ასე არ მოხდა. ჩვენი, ევროპელების, ანაბრები სხვა ადგილას მოიტანს მოგებას. დღეს 300 მილიარდ ევროზე მეტი ევროპისთვის არ მუშაობს. მესამეც ის, რომ მუშახელის პროფესიული კვალიფიკაცია ყველგან აღიარონ. ახლა მუშახელს შეუძლია გადაადგილება, მაგრამ კვალიფიკაცია თავიდან უნდა მიიღოს. ეს კი, რასაკვირველია, ჩვენი მუშახელის ეფექტიანად გამოყენებასა და ევროპის ენერგიის გაერთიანებას ართულებს. ასე რომ, რა თქმა უნდა, მარიო დრაგიმ უაღრესად სრულყოფილი რეკომენდაციების პაკეტი დაგვიდო. ამის შემდეგ უამრავი მაღალფარდოვანი შეფასება მოვისმინეთ, როგორი მნიშვნელოვანია თურმე ეს და რომ აუცილებლად უნდა შევასრულოთ. მაგრამ უფრო მეტს ვლაპარაკობთ მის შესრულებაზე, ვიდრე საქმით ვაკეთებთ. ასე რომ, ევროპა, უნდა აჩქარდე!“
მარია ტადეო, ევრონიუსი: „ეს ძალიან კარგი შენიშვნაა, რადგან ამ ანგარიშის გამოქვეყნებიდან ერთი წელი გავიდა, მისი დათქმა კი ის იყო, რომ თუ ევროპა რადიკალურ ცვლილებებს არ გაატარებდა, ნელი ტანჯვით აღმოხდებოდა სული. რას უნდა ველოდოთ?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „მე ოპტიმისტურად ვუყურებ ევროპის მომავალს, რადგან რამდენჯერმე უკვე ვნახე, რომ, როცა მართლა ძალიან რთულად იყო საქმე, ევროპამ სწორი არჩევანი გააკეთა. ხშირად ამისთვის დიდი დრო სჭირდებოდა, მაგრამ როცა კრიტიკული მომენტი დგებოდა, მაგალითად, ევროზონის კრიზისის დროს, გადამწყვეტმა მოქმედებამ გადაარჩინა ევროპა და მაშინ სწორედ მარიო დრაგიმ თქვა ასეთი ფრაზა: „რადაც არ უნდა დაგვიჯდეს.“ სწორედ ასეთი მომენტი დგას ახლა. რატომ? იმიტომ, რომ თუ შეადარებ ამერიკის შეერთებული შტატების პროდუქტიულობას ევროპისას, ევროპა ჩამორჩება. ევროპის ეკონომიკის ზრდა 1.2 პროცენტია. როგორ, ამდენი სიმდიდრე გვაქვს და მხოლოდ 1.2-პროცენტიანი ზრდა შეგვიძლია? ამერიკაში კომპანიები ძალიან სწრაფად ფართოვდებიან. ევროპაში არ არსებობს მაღალი ტექნოლოგიური კომპანიის სწრაფად ზრდის ფენომენი. შეუძლია ევროპას დაწევა? რა თქმა უნდა. მაგრამ ამისთვის ერთიანი ბაზრის შექმნა პრიორიტეტად უნდა ვაქციოთ. მე იმასაც კი ვურჩევდი, რომ ერთიანი ბაზრის მეფე გვყავდეს – რომ იყოს ადამიანი, რომელსაც მიენიჭება ერთიანი ბაზრის ყველა ასპექტის მართვის უფლება“.
მარია ტადეო, ევრონიუსი: „ეს შესანიშნავი აზრია, რადგან ახლა პრობლემა ის არის, რომ ევროპას ძალიან სუსტი ხელმძღვანელობა ჰყავს. ვინ შეიძლება იყოს ეს ყოვლისშემძლე? კაცია თუ ქალი?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „იცით, მე მგონია, რომ…“
მარია ტადეო, ევრონიუსი: „გყავთ ვინმე მხედველობაში?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „მოდი, ასე ვიტყვი, ევროპის ეკონომიკის ფლანგზე ძალიან ძლიერი ლიდერები მინახავს. და მიმაჩნია, რომ თუ ევროპას ნამდვილად უნდა პასუხისმგებლობის დელეგირება, ევროპას საკმარისი კვალიფიკაცია აქვს ამის აღსრულებისთვის. უბრალოდ მინდა, შეგახსენოთ, რომ, როდესაც გაერთიანებულმა სამეფომ გადაწყვიტა ევროკავშირის დატოვება, მაშინ, იცით, რა ქნა ევროპამ? 27 წევრი ქვეყნის სახელით მოლაპარაკებების წარმოების უფლება მიშელ ბარნიეს – ერთ ადამიანს მიანიჭა. და ამ ერთ კაცს შეეძლო, შეხვედროდა სახელმწიფოთა მეთაურებს, რასაც ევროკომისიის გავლით აკეთებდა, აწარმოებდა მოლაპარაკებებს და ამის შედეგად ყველა წევრმა სახელმწიფომ მიიღო სარგებელი. ამიტომ დარწმუნებული ვარ, რომ თუ ნება იქნება, აღსრულების გზაც გამოჩნდება. ამჟამად ეს ყველაფერი, რაზეც ახლა ვსაუბრობ, საბჭოს სხვადასხვა ინსტანციის ხელშია“.
მარია ტადეო, ევრონიუსი: „მეტისმეტად ბევრი მზარეულია.“
კრისტალინა გეორგიევა, საერთაშორისო სავალუტო ფონდის მმართველი დირექტორი: „და სხვადასხვა ევროკომისარი მართავს. მეც ვიყავი ევროკომისარი. და ვიცი, რომ თუკი სრულუფლებიანი არ ხარ, ძალიან რთულია ვითარების გარღვევა. ამიტომ ევროპამ უნდა თქვას, რომ უნდა საუკეთესო მომავალი ჰქონდეს. ამას კი ერთიანი ბაზრის გარეშე ვერ მიაღწევ. უბრალოდ შეუძლებელია“.
მარია ტადეო, ევრონიუსი: „თქვენ შესანიშნავი აზრი გამოთქვით. თუ სწორად გავიგე, მგონი, იმას გვთავაზობთ, რომ ამ ანგარიშის რეკომენდაციების შესასრულებლად საჭიროა მხოლოდ ერთ ადამიანს მიენიჭოს ყველაფრის აღსრულებაზე უფლებამოსლება და დაეკისროს პასუხისმგებლობა? დარწმუნებული ვარ, გეგულებათ კიდეც ასეთი ადამიანი“.
კრისტალინა გეორგიევა, საერთაშორისო სავალუტო ფონდის მმართველი დირექტორი: „ამის გადაწყვეტას ევროპის ლიდერებს დავუთმობდი. ჩემი აზრით, მთავარია, შეთანხმდნენ, რომ აუცილებელია უფლებამოსილების დელეგირება. და ეს დელეგირება უნდა გავრცელდეს ერთიანი ბაზრის კონკურენტუნარიანობისთვის აუცილებელ ყველა სფეროზე. ამ წუთას სხვა…“
მარია ტადეო, ევრონიუსი: „ეს ძალიან კომპლექსური საკითხია“.
კრისტალინა გეორგიევა, საერთაშორისო სავალუტო ფონდის მმართველი დირექტორი: „კომპლექსურია და საკმარისად სწრაფად არ მიდის წინ. ვიცი, რომ საკითხი წინ მიიწევს და მსურს ვუთხრა იმ ევროპელებს, რომლებიც ამაზე მუშაობენ, რომ ყოჩაღ, განაგრძეთ საქმე, მაგრამ უფრო სწრაფად“.
მარია ტადეო, ევრონიუსი: „წელს ერთ-ერთი ყველაზე მნიშვნელოვანი თემა სატარიფო რეჟიმი იყო. რაც შეეხება ევროპას, ევროკავშირს ტარიფები გაუსამმაგეს. 15 პროცენტი გაუხადეს. შეაფასეთ მისი გავლენა? ზოგი იმასაც ამბობს, რომ ეს ევროპის დამცირების საუკუნის დაწყებაზე მიანიშნებს. ეს 15 პროცენტი მართლაც მეტისმეტი ხომ არ არის?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „ჩემი აზრით, ევროპა ამას გადაიტანს. ვნახოთ, რა მოხდება. ტარიფები გამოცხადდა. ვაჭრობასთან დაკავშირებით ძალიან დიდი ბუნდოვანებაა. პანიკაც კი დაიწყო, რომ მსოფლიო რეცესიაში ჩავარდებოდა. სხვათა შორის, სავალუტო ფონდი არ დაეთანხმა რეცესიის მოსაზრებას. სინამდვილეში მსოფლიომ დაამტკიცა, რომ გაცილებით გამძლეა. შეხედეთ ევროპას…მაინც რა არის მისი გამძლეობის რესურსი? მტკიცე ინსტიტუციები, კარგი პოლიტიკა, პასუხისმგებლობის მქონე მთავრობა და კერძო სექტორი, რომელიც გაცილებით სწრაფად ერგება ცვლილებას, ვიდრე საჯარო სექტორი. მაგრამ როდესაც ახალი ტარიფები გამოცხადდა აპრილში, მთელი მსოფლიოსთვის საშუალოდ 23% გამოვიდა, მაგრამ დღეს ეს მაჩვენებელი დაახლოებით 17%-ია. თუ გადაამოწმებ, რეალურად რამდენი გროვდება, ამა თუ იმ გამონაკლისის გათვალისწინებთ, 9-10 % გამოდის. სხვაგვარად რომ ვთქვათ, ტარიფის დარტყმა არც ისე ძლიერია. რაც ყველაზე მნიშვნელოვანია და რისთვისაც ასე მიყვარს ევროპა, ის არის, რომ მისი ქვეყნების უმრავლესობამ უარი თქვა სამაგიერო ტარიფზე. კბილი კბილის წილ არ მიუგო. ვიცი, რომ ევროპაში ზოგი ამბობს, უნდა შემოგვეღოო“.
მარია ტადეო, ევრონიუსი: „ევროპა სუსტი გამოდგა“.
კრისტალინა გეორგიევა, საერთაშორისო სავალუტო ფონდის მმართველი დირექტორი: „სუსტი გამოდგა, მაგრამ რა მოხდებოდა, სამაგიერო რომ მიეზღო და ყველა ასე მოქცეულიყო? უკუსვლის სპირალი ამოქმედდებოდა. დღეს კი ისეთი მდგომარეობა გვაქვს, როდესაც თქვეს: კი ბატონო, ამერიკა, შენ ამ გზით გადაწყვიტე სიარული, მაგრამ ჩვენ ასე არ მოვიქცევით. მართალია, შენ ვაჭრობის 14%-ს წარმოადგენ, მაგრამ დანარჩენი 86-87 პროცენტი ვამჯობინებთ, ვივაჭროთ იმ წესების მიხედვით, რომლებიც დავადგინეთ. სწორედ ამან გადაარჩინა მსოფლიო ეკონომიკა. ყველამ არ სცადა ერთმანეთისთვის ზიანის მიყენება. ეს ამბავი ჯერ არ დასრულებულა. შესაძლოა, ვითარება შეიცვალოს. და მე ნამდვილად მოვუწოდებ ქვეყნებს, ნუ გააჩაღებთ სავაჭრო ომს. ამას ნუ იზამთ“.
მარია ტადეო, ევრონიუსი: „იმის თქმა გინდათ, რომ ევროპამ პასუხისმგებლობა გამოიჩინა, როდესაც მიიღო ეს 15%, რომელიც შესაძლოა ნაკლებად საზიანო იყოს, როცა ამოქმედდება. თუმცა ზოგი მიიჩნევს, რომ ევროპამ პოლიტიკურად იზარალა. რომ ევროკავშირს უნდა მიეზღო სამაგიერო და ძალა ეჩვენებინა“.
კრისტალინა გეორგიევა, საერთაშორისო სავალუტო ფონდის მმართველი დირექტორი:
„ჩემი აზრით, ევროპას შეუძლია ძალის დემონსტრირება, თუკი აქტიურად ითანამშრომლებს მათთან, ვისაც წესების დაცვით სურს ვაჭრობა. მე მოვუწოდებდი ევროპას, რომ იყოს ლიდერი ამ კუთხით. თუ დღევანდელ მულტიპოლარულ მსოფლიოს გადახედავ, დაინახავ, რომ რამდენიმე რეგიონი უფრო ძლიერი შიდა რეგიონული ვაჭრობის შექმნას ცდილობს, როგორიცაა, მაგალითად, ასიანი ASEAN (სამხრეთ-აღმოსავლეთ აზიის ქვეყნების ასოციაცია) ან სპარსეთის ყურის ქვეყნები. ევროპამ უკვე დაიწყო აქტიური მუშაობა, რათა შეთანხმებები დადოს სხვადასხვა ახალ ბლოკთან. აი, სწორედ აქ უნდა აამოქმედოს ევროპამ თავისი რბილი ძალა. მსოფლიოს სავაჭრო ომი უნდა ააცილოს“.
მარია ტადეო, ევრონიუსი: „ანუ თქვენ მიესალმებით მერკოსურის შეთანხმებას? ევროპული მსოფლიო სავაჭრო ორგანიზაციის შექმნა ხომ არ გსურთ? ეს აზრი არ გამოთქმულა?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „ნამდვილად ასეა. მინდა, რომ ევროპელებმა უარი თქვან სავაჭრო ომზე, დიდი მადლობა, მაგრამ არ გვსურსო. ჩვენ მსოფლიოს დანარჩენ ქვეყნებთან ვაპირებთ თანამშრომლობასო. პრინციპში მე ოპტიმისტურად ვუყურებ, საითაც მივდივართ, რადგან თუ კაცობრიობის ისტორიას გადახედავ, ის ვაჭრობის ისტორიაა. ვაჭრობა წყალს ჰგავს. თუ დაბრკოლებას შეუქმნი, ის გარს შემოუვლის. თუმცა გარს შემოვლა შესაძლებელია როგორც ეფექტიანად, ისე ნაკლებად ეფექტიანად. ევროპამ ახალი მსოფლიო უნდა შექმნას, მრავალპოლუსიანი მსოფლიო, რომელიც მრავალ ინტერესს ითვალისწინებს და უფრო ეფექტიანად მუშაობს. ამის დიდი სურვილი უკვე შეიმჩნევა მსოფლიოში. უკვე ვისმენ ჩვენი წევრებისგან, რომ სურთ ევროპამ ლიდერობა იკისროს“.
მარია ტადეო, ევრონიუსი: „ეს შესაძლებელია? დღეს ხომ ბულგარეთში ვიმყოფებით, უკრაინა ძალიან ახლოსაა და აქ ნამდვილად იგრძნობა დროის სული. რამდენად შესაძლებელია ეს ყველაფერი იმ დროს, როცა კონტინენტზე ომი მძვინვარებს? თქვენი გამოცდილების გაზიარებაც მაინტერესებს, რადაგან თუ სწორად მახსოვს, მხოლოდ 35 წლის იყავით, როცა რკინის ფარდა დაეცა. მაშინ ეგონათ, რომ შესაძლებლობათა ახალი სამყარო გაჩნდა, ახლა კი კონტინენტურ ევროპაში ომია. თუ გიფიქრიათ, მაინც როგორ მივედით აქამდე?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „არასოდეს მიფიქრია, რომ ევროპაში სამხედრო ძალა შეეცდებოდა, დაეპყრო სხვა ქვეყანა, მაგრამ ეს მოხდა. დღევანდელ სამყაროში მეტი გაურკვევლობაა, ისეთი რამ შეიძლება მოხდეს, რასაც ვერავინ წარმოიდგენდა. ამიტომ უნდა ვაღიაროთ, რომ ეს არის სამყარო, რომელშიც ვცხოვრობთ და ვიცხოვრებთ. მაინც რას ნიშნავს ეს? ორ რამეს. ერთი, რომ ეს მეტ თანამშრომლობას მოითხოვს და არა – ნაკლებს. როდესაც ვერ ხედავ გზას, უფრო მეტად უნდა ითანამშრომლო სხვებთან, თანამოაზრეებთან. და მეორეც – საჭიროა მეტი სისხარტე და ადაპტაციის უნარი. ევროპისთვის ეს იმასაც ნიშნავს, რომ გადახედოს ევროპის დონეზე გადაწყვეტილების მიღების პროცესს. რამდენად კარგად მიდის? რამდენად ერგება სწრაფად ცვალებად სამყაროს? რაც შეეხება ჩემს გამოცდილებას, როდესაც ცივი ომი დასრულდა, ერთგვარი ეიფორის პერიოდი დადგა, როდესაც ვიგემეთ თავისუფლება და ეს ფანტასტიკური იყო, მაგრამ მერე მწარე რეალობის წინაშე აღმოვჩნდით. ძალიან რთულია ეკონომიკის გარდაქმნა. დღევანდელ მსოფლიოში უამრავი ტრანსფორმაცია მიდის, იქნება ეს გეოპოლიტიკური, სავაჭრო, ტექნოლოგიური, დემოგრაფიული თუ კლიმატური. წარმოიდგინეთ, რამდენად უფრო რთულია ასეთ სამყაროში ადაპტაცია და გარდაქმნა. დარწმუნებული ვარ, რომ ახალი წევრი სახელმწიფოები უფრო მეტად აიმაღლებენ ხმას ადაპტაციის მნიშვნელობაზე ამ ცვალებად სამყაროში, რადგან მათ საკუთარი გამოცდილებით კარგად იციან, ეს რაც არის“.
მარია ტადეო, ევრონიუსი: „თქვენ შეეხეთ კიდეც ყველა ამ თემას, საკმაოდ ბევრი საკითხია. ცხადია, რომ ახლა, როცა ომი მიდის, დგას დემოგრაფიის, კლიმატისა და ხელახალი შეიარაღების საკითხი. ცხადია, ყველა დასთანხმდა ნატოში 5%-ის გადახდას. მაგრამ მე ვერ ვხედავ ფისკალურ სივრცეს, ვხედავ უამრავ გამოწვევას, მაგრამ ვერ ვხედავ პოლიტიკურ კონსესუსს ბიუჯეტის ირგვლივ. ამაზე რას ფიქრობთ?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „რა უნდა გააკეთო, როცა არ გაქვს ფისკალური სივრცე? უნდა შექმნა. როგორ უნდა შექმნა? პირველ რიგში, ევროპა უნდა გახადო უფრო კონკურენტუნარიანი, უფრო პროდუქტიული, უფრო მეტი უნდა იყოს ზრდა, რათა მეტი სივრცე შექმნა. მეორე მხრივ, საჭიროა რეფორმა. ყველამ ვიცით, როგორც ხდება რეფორმა, მაგალითად, საპენსიო რეფორმა ძალიან რთულია. ჩემი აზრით, უნდა…
მარია ტადეო, ევრონიუსი: „ფრანგებმა ახლახან შეაჩერეს ეს რეფორმა. ძალიან გადაიღალა ხალხი ამით“.
კრისტალინა გეორგიევა, საერთაშორისო სავალუტო ფონდის მმართველი დირექტორი: „ხალხი უნდა ჩავაყენოთ საქმის კურში და გულწრფელად ვუთხრათ, რომ, თუ გსურს, რომ შენ და რაც უფრო მნიშვნელოვანია – შენმა შვილებმა და შვილიშვილებმა თქვენთვის სასურველი მაღალი სტანდარტით იცხოვროთ, ევროპა უფრო პროდუქტიული უნდა გახდეს. იმ ევროპელებმა, რომლებიც უფრო დიდხანს ცხოვრობენ, უფრო მეტიც უნდა იმუშაონ. თქვენ ცივი ომის დასრულების პერიოდი ახსენეთ. მაშინ პროფესორი ვიყავი ბულგარეთში და დარწმუნებული ვიყავი, რომ 55 წლის ასაკში პენსიაზე გავიდოდი, როგორც პროფესორი. არადა, შემომხედეთ ახლა. მე არ გეტყვით ჩემს ასაკს, ამის მიხვედრა ადვილია, 55-ის ნამდვილად არ ვარ, მაგრამ მაინც ვმუშაობ და ბედნიერი ვარ ჩემი პროდუქტიულობით. ასე რომ, უნდა დავამსხვრიოთ ევროპაში ტაბუ ისეთ თემებზე, რომლებიც ხელს უშლიან იმ ფისკალური სივრცის შექმნას, რომელზეც თქვენ საუბრობთ“.
მარია ტადეო, ევრონიუსი: „თქვენ ამბობთ, რომ ევროპაში რამდენიმე ტაბუ არსებობს. ერთი მათგანი ნამდვილად ეხება ვალს. დიდი კამათი მიმდინარეობს კარგ და ცუდ ვალზე. მაინტერესებს, რამდენად გადარდებთ ვალის მთლიან შიდა პროდუქტთან მიმართების ტრაექტორია ევროპაში? ან რამდენად გამართლებულად მიგაჩნიათ ერთიანი ვალის აღება გარკვეულ სფეროებში?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „აქ ორი საკითხია. ერთი ის, რომ ტრაექტორია ყველა ქვეყანაში განსხვავებულია. ახლა ბულგარეთში ვართ და მისი ვალი მშპ-სთან მიმართებით 24%-ია. მაგრამ მაინც ვღელავთ, რომ შესაძლოა, სესხის აღების მადა მოემატოთ. ქვეყნებმა, რომლებსაც დიდი ვალი აქვთ, ნამდვილად უნდა შეიმუშაონ მისი შემცირების საშუალოვადიანი სტრატეგია, რადგან სხვა შემთხვევაში ეს ვალი აღარ იძლევა განათლებაში, ხელოვნურ ინტელექტში – პროდუქტიულ მიმართულებებში ინვესტირების საშუალებას. მეორეც, მტკიცედ მჯერა, რომ ევროპამ უნდა გამოიყენოს ერთად სესხის აღებისა და რესურსების ერთიანი ძალით ათვისების შესაძლებლობა“.
მარია ტადეო, ევრონიუსი: „თქვენ ერთიანი ვალის მომხრე ხართ კრიტიკულ სფეროებში?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „თუ გსურთ, რომ ყველაზე ეფექტიანად განახორციელოთ ინვესტიციები, რესურსები ამ გზით უნდა მოიზიდო და განავითარო. ვიცი, რომ ეს რთული თემაა, მაგრამ…“
მარია ტადეო, ევრონიუსი: „ამას ბევრი ამბობს. რატომ არ ხდება ასე? თქვენ ხართ ამ საქმის პროფესიონალი და იცით, ეს როგორ მუშაობს. მაინც რა არის პრობლემა?“
კრისტალინა გეორგიევა, საერთაშორისო სავალუტო ფონდის მმართველი დირექტორი: „პრობლემა, რა თქმა უნდა არის 27 წევრი ქვეყანა, ყველას განსხვავებული პრიორიტეტი და გადაწყვეტილების მიღების განსხვავებული პროცესი აქვს. ასეთი მრავალფეროვნება სიმდიდრეა, მაგრამ გადაწყვეტილების მიღების ჩვენი პროცესი მაინცდამაინც ვერ უწყობს ფეხს დღევანდელი სამყაროს ცვლილების ტემპს“.
მარია ტადეო, ევრონიუსი: „და რას გეუბნებათ თქვენი პოლიტიკური ინსტინქტი? მოხდება ეს საბოლოო ჯამში? პანდემიის დროს მოხდა“.
კრისტალინა გეორგიევა, საერთაშორისო სავალუტო ფონდის მმართველი დირექტორი: „დარწმუნებული ვარ, რომ შევეჭიდებით პრობლემას და ბოლოს ისტორიის სწორ მხარეს დავდგებით, როგორც მრავალჯერ გაგვიკეთებია. მე ღრმად მწამს ევროპისა. ჩემი აზრით, ევროპული პროექტი აღფრთოვანებას იწვევს და ეს აღფრთოვანება უნდა დავიბრუნოთ. და მერე ევროპის მოსახლეობას გულწრფელად ვესაუბროთ. კარგად ცხოვრება გინდათ? მაშინ უნდა ვითანამშრომლოთ ყველამ. ერთად უფრო ეეფქტიანად უნდა ავითვისოთ ჩვენი რესურსები და უფრო პროდუქტიული უნდა გავხდეთ. სხვა გზა უბრალოდ არ არის. ვეღარ გავაგრძელებთ იმ ფულის ხარჯვას, რომელიც არ გვაქვს“.
მარია ტადეო, ევრონიუსი: „და ბოლო კითხვა მაქვს. ეს აუცილებლად უნდა გკითხოთ, რადგან ბულგარეთში ვართ ახლა. ცხადია, თავს ძალიან ძლიერად გრძნობთ, თქვენ უამრავი დრო და ენერგია დახარჯეთ, რათა ეს ქვეყანა ევროზე გადაგეყვანათ. ევრო ამოქმედდა წელს, მაგრამ გულწრფელად რომ გითხრათ, ძალიან ბევრი მღელვარება შევამჩნიე ამასთან დაკავშირებით აეროპორტიდან მოყოლებული სტუდიამდე. ხალხი ღელავს ევროზე, ფასებზე, ინფლაციაზე, ფიქრობენ, რას მოუტანს ეს ჩვენს ქვეყანას და რამდენად გაამართლებსო. რას იტყვით ამაზე? იმიტომ, რომ თქვენ ნამდვილად შეამჩნევდით ფულის შეცვლასთან დაკავშირებულ მღელვარებას“.
კრისტალინა გეორგიევა, საერთაშორისო სავალუტო ფონდის მმართველი დირექტორი: „ჩემს საყვარელ ბულგარელებს ვეტყოდი, რომ უკვე დიდი ხანია, ევროზონაში ვართ, რადგან ბულგარეთს ჰყავს სავალუტო საბჭო. ჩვენი სუვერენიტეტი მონეტარულ პოლიტიკასთან დაკავშირებით უკვე გადავეცით ჯერ ბუნდესბანკს Bundesbank და მერე ევროპის ცენტრალურ ბანკს. ჩვენ ვიყავით ევროზონაში, მაგრამ არ გვქონდა ხმის უფლება. ახლა კი გვექნება ხმის მიცემის უფლება და ვისარგებლებთ ევროზონის ბუფერით. თუმცა ევრო უფრო დინამიკური ეკონომიკის წინაპირობაა და არა ცხოვრების სტანდარტის ზრდის გარანტია. ჩვენ უნდა გავაგრძელოთ რეფორმის გზა, რომ უფრო გავძლიერდეთ ეკონომიკურად სწორი ფისკალური პოლიტიკის, ვალის სწორი მენეჯმენტის საფუძველზე და ყველაფერთან ერთად ყურადღება უნდა გავამახვილოთ ჩვენი ხალხის პროდუქტიულობაზე“.
ავტორი: მარია ტადეო
