<h5><strong>საფრანგეთში ტელემარკეტინგი დასასრულს უახლოვდება, ყოველ შემთხვევაში იმ რეეგულაციებით ვეღარ გაგრძელდება, რომლებიც აქამდე იყო. 11 აგვისტოდან ძალაში შედის კანონი, რომელიც ამკაცრებს წესებს და კრძალავს არასასურველ, შემაწუხებელ ზარებს.</strong></h5> <p>მიზანია მოქალაქეების დაცვა მომაბეზრებელი გაყიდვების მოწოდებებისა და თაღლითური პრაქტიკისგან.</p> <p>ახლა აკრძალული იქნება მომხმარებლებთან დაკავშირება მათი წინასწარი თანხმობის გარეშე, რომლის გაუქმებაც ნებისმიერ დროს შეიძლება.</p> <p>ბოლო თხუთმეტი წლის განმავლობაში უკვე გატარდა მრავალი ზომა. მაგალითად, აიკრძალა პირდაპირი ზარები 06 ან 07 ნომრებიდან, ასევე მომხმარებელს ვერ უკავშირდებოდნენ დღის გარკვეულ საათებში ან უქმეებზე.</p> <p>თუმცა, ეს შეზღუდვები მხოლოდ რამდენიმე კონკრეტული სექტორისთვის დაწესდა. ამიერიდან აკრძალვა პრაქტიკულად ყველა სექტორს შეეხება.</p> <p>აქამდე მოქალაქეებს უწევდათ პლატფორმაზე დარეგისტრირება, რათა უარი ეთქვათ დაკავშირებაზე. „ამგვარად, ჩვენ გადავდივართ „უარის თქმის“ სისტემიდან „წინასწარი თანხმობის“ სისტემაზე“, - აღნიშნავს საფრანგეთის ფინანსთა სამინისტრო</p> <p>თუმცა, პირდაპირი ზარები დაშვებული იქნება ორ შემთხვევაში: როდესაც საქმე ეხება თქვენ მიერ უკვე დადებულ კონტრაქტს; ან როდესაც კომპანიამ მიიღო თქვენი წინასწარი თანხმობა, მაგალითად, შეძენის, მაღაზიაში ვიზიტის დროს ან განაცხადის მეშვეობით.</p>
Search