ყაზახეთმა ველურ ბუნებაში პირველი ვეფხვი გაუშვა მას შემდეგ, რაც 70 წლის წინ რეგიონიდან საერთოდ გაქრა თურანული ვეფხვი. ძუ ვეფხვი ილე-ბალხაშის ნაკრძალში გაუშვეს. ის ერთ-ერთი იყო იმ ოთხი ამურის ვეფხვიდან, რომლებიც რუსეთიდან მაისში რეინტროდუქციის პროგრამის ფარგლებში ჩამოიყვანეს.
„ეს არის გრძელვადიანი პროექტი, რომელიც 30-35 წელიწადს გაგრძელდება. ჩვენ ბოლო 10 წელი უკვე დავუთმეთ მის მომზადებას. ამ დროის განმავლობაში შევქმენით დაცული ნაკრძალი და გავზარდეთ ის ცხოველები, რომლებსაც ეს ვეფხვი მოინადირებს. ჩვენ 219 ირემი და 100-ზე მეტი კულანი ჩამოვიყვანეთ. ამ ტერიტორიაზე ასევე ბინადრობენ გარეული ღორისა და შველის ჯანსაღი პოპულაციები“. - განაცხადა ყაზახეთის ეკოლოგიისა და ბუნებრივი რესურსების მინისტრი, იერლან ნისანბაევი
გათავისუფლების შემდეგ ვეფხვი მკაცრი მონიტორინგის ქვეშ იქნება. GPS-ის სატელიტური საყელო და ფოტო-ვიდეო ხაფანგები ექსპერტებს მისი გადაადგილების თვალყურის დევნებაში დაეხმარება. ახლომდებარე სოფლების მცხოვრებლებს კი ეცნობებათ, თუ ვეფხვი მათ სახლებთან ხუთი კილომეტრის რადიუსში მივა.