ევროკავშირის ლიდერები 15 აგვისტოს აშშ-ის პრეზიდენტის, დონალდ ტრამპისა და რუსეთის პრეზიდენტის, ვლადიმერ პუტინის ალასკაში დაგეგმილი ვიზიტის შესახებ განცხადებას ავრცელებენ.
„ჩვენ, ევროკავშირის ლიდერები, მივესალმებით პრეზიდენტი ტრამპის ძალისხმევას, დაასრულოს უკრაინის წინააღმდეგ რუსეთის ომი და მიაღწიოს უკრაინისთვის სამართლიან და მდგრად მშვიდობასა და უსაფრთხოებას.
სამართლიანი და მდგრადი მშვიდობა, რომელიც სტაბილურობასა და უსაფრთხოებას მოიტანს, უნდა ითვალისწინებდეს საერთაშორისო სამართლის პრინციპებს, მათ შორის დამოუკიდებლობის, სუვერენიტეტისა და ტერიტორიული მთლიანობის პრინციპებს და იმას, რომ საერთაშორისო საზღვრები ძალის გამოყენებით არ იცვლებოდეს.
უკრაინელებს უნდა ჰქონდეთ თავისუფლება, თავად გადაწყვიტონ საკუთარი მომავალი. უკრაინაში მშვიდობისკენ მიმავალი გზა უკრაინის გარეშე ვერ გაიკვალება. მნიშვნელოვანი მოლაპარაკებები მხოლოდ ცეცხლის შეწყვეტის ან საომარი მოქმედებების შემცირების კონტექსტში შეიძლება წარიმართოს.
The EU welcomes President Trump’s efforts to put an end to Russia’s war of aggression and to achieve a just & lasting peace and security for Ukraine.
We stand with the Ukrainian people, united for a diplomatic solution that protects Ukraine’s & Europe’s vital security interests.
— António Costa (@eucopresident) August 12, 2025
რუსეთის მიერ უკრაინის წინააღმდეგ განხორციელებულ აგრესიულ ომს მასშტაბური შედეგები მოჰყვება ევროპული და საერთაშორისო უსაფრთხოებისთვის. ჩვენ ვიზიარებთ იმ რწმენას, რომ კონფლიქტის გადაჭრის დიპლომატიურმა გზამ დაიცვას უკრაინისა და ევროპის სასიცოცხლო უსაფრთხოების ინტერესები.
ევროკავშირი აშშ-სა და სხვა თანამოაზრე პარტნიორებთან კოორდინაციით გააგრძელებს უკრაინისთვის პოლიტიკური, ფინანსური, ჰუმანიტარული, სამხედრო და დიპლომატიური მხარდაჭერის გაწევას, რადგან უკრაინა იყენებს მისთვის მინიჭებულ თავდაცვის უფლებას. ის ასევე გააგრძელებს რუსეთის ფედერაციის წინააღმდეგ შემზღუდავი ზომების დაწესებასა და დაცვას.
უკრაინა, რომელსაც შეუძლია ეფექტიანად დაიცვას თავი, ნებისმიერი სამომავლო უსაფრთხოების გარანტიის განუყოფელი ნაწილია. ევროკავშირი და წევრი სახელმწიფოები მზად არიან, თავიანთი კომპეტენციებისა და შესაძლებლობების ფარგლებში საერთაშორისო სამართლის პრინციპების შესაბამისად უსაფრთხოების გარანტიებში დამატებითი წვლილი შეიტანონ სხვა წევრი სახელმწიფოების უსაფრთხოებისა და თავდაცვის პოლიტიკის სრული პატივისცემითა და გათვალისწინებით.
ევროკავშირი ხაზს უსვამს, რომ უკრაინას აქვს თანდაყოლილი უფლება, თავად განსაზღვროს საკუთარი ბედი და ევროკავშირი გააგრძელებს მის მხარდაჭერას ევროკავშირში გაწევრების გზაზე”, – ნათქვამია ევროკავშირის ლიდერების ერთობლივ განცხადებაში.
აშშ-ის პრეზიდენტი დონალდ ტრამპი ალასკაში ვლადიმერ პუტინს 15 აგვისტოს შეხვდება. დონალდ ტრამპის თქმით, შეხვედრის დასრულებისთანავე ვოლოდიმირ ზელენსკის დაურეკავს და შეთანხმების პირობებს გააცნობს.
ევროპელი ლიდერები შიშობენ, რომ შესაძლოა ტრამპსა და პუტინს შორის გარიგება რუსეთის სასარგებლოდ დაიდოს და შეხვედრაზე უკრაინის პრეზიდენტის დასწრებასაც მოითხოვენ.
