შინაგან საქმეთა მინისტრის, გელა გელაძის განცხადებით, სამართალდამცველებმა ნარკოდანაშაულის ბრალდებით დააკავეს კიდევ 43 პირი.
უწყებაში გამართულ ბრიფინგზე მინისტრმა თქვა, რომ დაკავებულთა შორის არიან როგორც საქართველოს, ისე უცხო ქვეყნების მოქალაქეები.
გელა გელაძის თანახმად, მათ ბრალად ედებათ განსაკუთრებით დიდი ოდენობით ნარკოტიკული საშუალებების საქართველოში შემოტანა, შეძენა-შენახვა და რეალიზაცია.
„მთელი ქვეყნის მასშტაბით ჩატარებული ოპერატიული და საგამოძიებო ღონისძიებების შედეგად, ბრალდებულების მიერ მითითებული ადგილებიდან, ასევე, დაკავებულების პირადი, ავტომანქანებისა და საცხოვრებელი სახლების ჩხრეკისას, ნივთმტკიცების სახით ამოღებულია დიდი და განსაკუთრებით დიდი ოდენობით ნარკოტიკული საშუალებები…
სამართალდამცველების მიერ მოპოვებული მტკიცებულებებით დგინდება, რომ დაკავებული პირები ნარკოტიკული საშუალებების რეალიზაციისათვის იყენებდნენ სხვადასხვა ინტერნეტ-აპლიკაციას, სოციალურ ქსელებს და ასევე, ე.წ. „ხელიდან ხელში“ გადაცემის მეთოდს“, – განაცხადა შს მინისტრმა, გელა გელაძემ.
კანონმდებლობის თანახმად, ბრალის დამტკიცების შემთხვევაში, დაკავებულებს 20 წლამდე ან უვადო პატიმრობა ემუქრებათ.
