თურქეთი სირიისთვის აზერბაიჯანიდან ბუნებრივი აირის მიწოდებას იწყებს, რათა ქვეყანას ელექტროენერგიის გამომუშავება დაეხმაროს.
სამხრეთ-აღმოსავლეთ თურქეთში გაიმართა პროექტის გახსნის ცერემონია, რომელშიც სირიის, თურქეთისა და აზერბაიჯანის ენერგეტიკის მინისტრები მონაწილეობდნენ.
„ჩვენ ვაგრძელებთ დაახლოებით 93 კმ-იანი მილსადენის მშენებლობას სირიის მიმართულებით. დღევანდელი ცერემონია ეხება მილსადენს, რომელმაც მიაღწია იავუზლუს გამზომ სადგურს, კილისის პროვინციის სოფელ იავუზლუში, სირია-თურქეთის საზღვარზე. კომპანია Botas-მა ითანამშრომლა სირიის გაზის კომპანია SGC-სთან მილსადენის სირიული ნაწილისთვის ინფრასტრუქტურის მოსამზადებლად და ყოველგვარი ტექნიკური მხარდაჭერის უზრუნველსაყოფად. ჩვენი პატივცემული სტუმრები მალე გახსნიან სარქველს, რათა დაიწყონ ბუნებრივი აირის მიწოდება აზერბაიჯანიდან სირიაში კილისის გავლით. იავუზლუს სადგური კი დღეში 6 მილიონ კუბურ მეტრ გაზს მიაწვდის“, – ამბობს ალფარსლან ბაირაქთარი, თურქეთის ენერგეტიკის მინისტრი.
მილსადენი ამჟამად კილისის პროვინციაში, თურქეთ-სირიის საზღვარზე, იავუზლუს გამზომ სადგურამდეა მისული და დღეში 6 მილიონ კუბურ მეტრ ბუნებრივ აირს აწვდის აზერბაიჯანს.
„ჩვენ გაზს მივაწვდით ალეპოს, შემდეგ ალეპოდან ჰომსს და ამიტომ იქაური ელექტროსადგურები მალე ამოქმედდება. ამ პირველ ფაზაში დღეიდან დავასრულეთ ინფრასტრუქტურა, რომელსაც შეუძლია წელიწადში 2 მილიარდი კუბური მეტრი ბუნებრივი აირის ექსპორტი სირიაში. ეს ბუნებრივი აირი ექსპლუატაციაში ჩაუშვებს 1200-მეგავატიან ელექტროსადგურს, რომელიც დააკმაყოფილებს სირიაში 5 მილიონი ოჯახის ელექტროენერგიის საჭიროებებს და მნიშვნელოვან როლს შეასრულებს იქ ცხოვრების ნორმალურ რეჟიმში დაბრუნებაში“, – ამბობს ალფარსლან ბაირაქთარი, თურქეთის ენერგეტიკის მინისტრი.
ექსპორტი თურქეთის მიერ აზერბაიჯანთან მიღწეული შეთანხმების საფუძველზე ხორციელდება, ხოლო პროექტის დაფინანსებაში უდიდესი წვლილი კატარს მიუძღვის.
„ჩვენ სიამაყით ვდგავართ სირიისა და თურქეთის დამაკავშირებელი რეგიონული ბუნებრივი აირის მილსადენის გახსნის ცერემონიაზე, რომელიც საშუალებას მოგვცემს, ჩვენი რეგიონული მოკავშირეების კოორდინაციისა და თანამშრომლობის წყალობით, 6 მილიონი კუბური მეტრი ბუნებრივი აირი მივიღოთ. პირველ ეტაპზე აზერბაიჯანიდან თურქეთში და თურქეთიდან ჩვენთან დღეში 3.4 მილიონი კუბური მეტრი მიეწოდება, რა თქმა უნდა, ჩვენი ძმების დახმარებითა და მხარდაჭერით კატარიდან“, – ამბობს მოჰამედ ალ-ბაშირი, სირიის ენერგეტიკის მინისტრი
თურქეთი, რომელიც ოდესღაც სირიის ყოფილი პრეზიდენტის, ბაშარ ალ-ასადის, დამხობის მსურველი, ამბოხებული ძალების ძლიერი მხარდამჭერი იყო, ახლა მტკიცედ უჭერს მხარს სირიის ახალ მთავრობას და ხელს უწყობს ქვეყნის სტაბილიზაციასა და აღდგენას.
