სლოვაკეთი რუსეთის ფედერაციის წინააღმდეგ სანქციების მე-18 პაკეტს აღარ დაბლოკავს.
ეს განცხადება სლოვაკეთის პრემიერ-მინისტრმა რობერტ ფიცომ გააკეთა. მან დაავალა ევროკავშირში ქვეყნის წარმომადგენლებს, მხარი დაუჭირონ სანქციების მე-18 პაკეტს.
როგორც ირკვევა, სლოვაკეთის პრემიერ-მინისტრი და ევროკომისიის პრეზიდენტი ურსულა ფონ დერ ლაიენი ბუნებრივი აირის ფასებთან დაკავშირებით გარანტიებზე შეთანხმდნენ. კერძოდ, საუბარია წერილობით გარანტიაზე, რომელსაც ხელს აწერენ ევროკომისიის პრეზიდენტი და ევროკომისრების კოლეგია.
გარანტიები ეხება ბუნებრივი აირის ფასებსა და მის შესაძლო დეფიციტს, სატრანსპორტო ტარიფებსა და ბუნებრივი აირის დეფიციტის ან ფასების მკვეთრი ზრდის შემთხვევაში საგანგებო მდგომარეობის გამოცხადების შესაძლებლობას.
რობერტ ფიცო განმარტავს, რომ კრიზისულ სიტუაციაში შესაძლოა რუსული გაზის იმპორტზე დაწესებული აკრძალვები მოიხსნას. ამრიგად, სლოვაკეთი მხარს დაუჭერს რუსეთის წინააღმდეგ სანქციების მეთვრამეტე პაკეტს.
თუმცა რობერტ ფიცო აცხადებს, რომ დამტკიცებული აქვს ეროვნული ინტერესების შესახებ გეგმა და ასევე სპეციალური ოპერატიული სამსახური, რომელიც ევროკომისიის მიერ მიცემული პირობების შესრულებას მკაცრად გააკონტროლებს. წინააღმდეგ შემთხვევაში, სლოვაკეთი არ დაუჭერს მხარს რუსეთის წინააღმდეგ სანქციების მე-19 პაკეტს, რომელზეც ევროკომისია უკვე მუშაობს.
