რუსეთმა უკრაინაზე კვლავ მიიტანა იერიში დრონებით. ადგილობრივი ხელისუფლების წარმომადგენლები აცხადებენ, რომ ოდესაში თავდასხმის შედეგად ერთი ადამიანი დაიღუპა. რუსების სამიზნე სამოქალაქო და ენერგოინფრასტრუქტურა იყო. ოდესის ნაწილი ელექტროენერგიის, წყლისა და გათბობის გარეშე დარჩა.
ეს ბოლო ორი კვირის განმავლობაში უკვე მეოთხე თავდასხმა იყო ოდესის ენერგოქსელზე. უკრაინის უმსხვილეს ენერგოკომპანიაში აცხადებენ, რომ დაზიანებულია ერთ-ერთი ენერგეტიკული ობიექტი.
ამასთან, თავდასხმის შედეგად ქალაქის გარეუბანში თითქმის 20 საცხოვრებელი სახლი, ასევე საზოგადოებრივი ობიექტები, მათ შორის ბიზნესცენტრი, ფოსტა და სამედიცინო ლაბორატორია დაზიანდა ან განადგურდა.
თავდასხმების სამიზნე იყო უკრაინის რამდენიმე სხვა რეგიონიც. რუსებმა რაკეტების გამოყენებით იერიში მიიტანეს დნიპროპეტროვსკის რეგიონზე, სადაც ორი სამრეწველო საწარმო დაზიანდა, ასევე ჩაიმსხვრა ფანჯრის მინები ორ მაღალსართულიან კორპუსში.
