პორტუგალიის ერთ-ერთი მკაცრი რეჟიმის ციხიდან გაიქცა 5 პატიმარი, რომელთა შორისაც ერთი ქართველია. ინფორმაციას ევრონიუსი ავრცელებს.
გაქცეულ პატიმრებს შორის ერთ-ერთი 42 წლის შერგილ ფარჯიანია. მას პორტუგალიის ციხეში 7 წლით პატიმრობა ჰქონდა მისჯილი ძარცვისა და დოკუმენტების გაყალბების ბრალდებით.
ფარჯიანთან ერთად ერთი ბრიტანელი, ორი პორტუგალიელი და ერთი არგენტინელი მსჯავრდადებულიც გაიქცა. გაქცეული პატიმრები მსჯავრს ისეთი მძიმე დანაშაულებისთვის იხდიდნენ, როგორებიცაა: მკვლელობა, ნარკოტიკების გადატანა, ქურდობა და გატაცება.
ადგილობრივი სამართალდამცავების განცხადებით, პატიმრებმა ზუსტად იცოდნენ, თუ რა მომენტში გადაიტანდნენ ყურადღებას ბადრაგები და სწორედ მაგ დროს, თოკის დახმარებით გადაძვრნენ ციხის 6-მეტრიანი ღობიდან. მათ გაქცევაში გარეთ მყოფი თანამზრახველები დაეხმარნენ.
პორტუგალიის ხელისუფლების განცხადებით, გაქცეულები განსაკუთრებით საშიში ტიპის დამნაშავეების სიას მიეკუთვნებიან და ხალხს მოუწოდებენ, რომ დანახვისთანავე აცნობონ პოლიციას მათი ადგილმდებარეობა.
