დაავადებათა კონტროლის ეროვნულ ცენტრში საკოორდინაციო საბჭოს შეხვედრა გაიმართა. საბჭოს წევრების განცხადებით, აქონდროპლაზიის სინდრომის მქონე ბავშვებისთვის მედიკამენტის დაფინანსებასთან დაკავშირებით, გადაწყვეტილება არ მიუღიათ.
საბჭოს სხდომის შემდეგ ჯანდაცვის სამინისტროს წარმომადგენლებმა განაცხადეს, რომ აქონდროპლაზიის სამკურნალო მედიკამენტ “ვოსორიტიდთან” დაკავშირებით, არსებული არასაკმარისი მტკიცებულებების გამო, მსოფლიოს განვითარებული ქვეყნები ფრთხილად ეკიდებიან საკითხს, რათა მაქსიმალურად გარანტირებული იყოს პაციენტის უსაფრთხოება. მათი თქმით, სწორედ ეს არის მიზეზი საქართველოს შემთხვევაშიც, რის გამოც მთავრობას მედიკამენტი არ შემოაქვს.
ამასთან, საბჭოს წევრებმა, აღნიშნეს, რომ მნიშვნელოვანია, შეფასდეს აქონდროპლაზიის სინდრომის მქონე ბავშვების საჭიროებები და გადაწყვეტილებაც შესაბამისად იქნას მიღებული. სპეციალისტების მხრიდან ხაზი გაესვა, რომ აღნიშნული წამლის შესახებ ზოგ შემთხვევაში, გადაჭარბებული მოლოდინებია და უფრო მნიშვნელოვანია აქონდროპლაზიის თანმდევი დაავადებების მკურნალობა.
თამარ გაბუნიამ განაცხადა, რომ ჯანდაცვის სამინისტრო დააფინანსებს და დააორგანიზებს ამ დიაგნოზით ბავშვების სხვა თანმდევი დაავადებების დიაგნოსტიკას, მკურნალობას, რეაბილიტაციასა და ყველა საჭირო პროცედურების როგორც საქართველოში, ასევე საზღვარგარეთ.
