აშშ-ის პრეზიდენტმა დონალდ ტრამპმა BBC-ის წინააღმდეგ სარჩელი შეიტანა და 5 მილიარდ დოლარს (დაახლოებით 3.7 მილიარდი ფუნტი სტერლინგის) ითხოვს. მიზეზი მისი 2021 წლის 6 იანვრის გამოსვლის რედაქტირებული ვერსიაა, რომელიც BBC-ის დოკუმენტურ გადაცემაში „პანორამა“ გავიდა..
ფლორიდაში შეტანილი სასამართლო დოკუმენტების მიხედვით, ტრამპი მაუწყებელს ცილისწამებასა და სავაჭრო პრაქტიკის შესახებ კანონის დარღვევაში ადანაშაულებს.
BBC-მ გასულ თვეში პრეზიდენტს ბოდიში მოუხადა, თუმცა უარყო კომპენსაციის მოთხოვნა და განაცხადა, რომ საქმეში „ცილისწამების სარჩელის სამართლებრივი საფუძველი არ არსებობს“.
ტრამპის იურიდიული გუნდის მტკიცებით, BBC-მ პრეზიდენტის გამოსვლა „განზრახ, ბოროტად და მოტყუებით გააყალბა“, რითაც მისი რეპუტაცია შელახა. BBC-ს სარჩელზე ოფიციალური პასუხი ჯერჯერობით არ გაუცია.
ტრამპმა სარჩელის შეტანის განზრახვა ჯერ კიდევ გასულ თვეში დააანონსა. საქმე ეხება დოკუმენტურ ფილმს, რომელიც დიდ ბრიტანეთში 2024 წლის აშშ-ის საპრეზიდენტო არჩევნებამდე გავიდა ეთერში.
„ვფიქრობ, ეს უნდა გავაკეთო“, – განაცხადა ტრამპმა ჟურნალისტებთან. „მათ მოატყუეს საზოგადოება. მათ შეცვალეს ჩემი სიტყვები“.
2021 წლის 6 იანვარს, კაპიტოლიუმში არეულობის დაწყებამდე, ტრამპმა შეკრებილ მხარდამჭერებს უთხრა:
„ჩვენ კაპიტოლიუმში მივალთ და ჩვენს მამაც სენატორებსა და კონგრესმენებს მხარდაჭერას გამოვუცხადებთ“.
გამოსვლიდან დაახლოებით 50 წუთის შემდეგ კი დაამატა:
„და ჩვენ ვიბრძოლებთ. ჯოჯოხეთურად ვიბრძოლებთ“.
თუმცა „პანორამაში“ ეს ფრაზები ისე იყო დამონტაჟებული, თითქოს ტრამპი ამბობდა:
„ჩვენ კაპიტოლიუმში ჩავალთ… მე თქვენთან ერთად ვიქნები. და ჩვენ ვიბრძოლებთ. ჯოჯოხეთურად ვიბრძოლებთ“.
BBC-მ მოგვიანებით აღიარა, რომ ასეთმა მონტაჟმა „არასწორი შთაბეჭდილება შექმნა“, თითქოს ტრამპმა „პირდაპირი მოწოდება გააკეთა ძალადობრივი ქმედებებისკენ“, თუმცა მაუწყებელი არ ეთანხმება ცილისწამების ბრალდებას.
ნოემბერში BBC-ის შიდა დოკუმენტებმა გაჟონა, რომელშიც მკაცრად იყო გაკრიტიკებული გამოსვლის რედაქტირების მეთოდი. სკანდალს შედეგად მოჰყვა BBC-ის გენერალური დირექტორის, ტიმ დეივის, და საინფორმაციო სამსახურის ხელმძღვანელის, დებორა ტერნესის გადადგომა.
სარჩელის შეტანამდე BBC-ის იურისტებმა ტრამპის ბრალდებებს ვრცელი წერილობითი პასუხი გასცეს. მათი განცხადებით, მონტაჟი ბოროტი განზრახვით არ გაკეთებულა და გადაცემას ტრამპისთვის ზიანი არ მიუყენებია, რადგან იგი მალევე ხელახლა აირჩიეს პრეზიდენტად.
