ისრაელში გრძელდება პოლიტიკური სკანდალი, რომელიც ქვეყნის არმიის სამხედრო პროკურორს, გენერალ-მაიორ იიფათ ტომერ-იერუშალმის უკავშირდება.
ყოფილი მაღალჩინოსანი, რომელმაც აღიარა, რომ გაავრცელა ვიდეო, რომელშიც, სავარაუდოდ, ისრაელელი ჯარისკაცების მიერ პალესტინელი ტყვის გაუპატიურება იყო ასახული, დაპატიმრებულია.
დაკავებამდე იიფათ ტომერ-იერუშალმი თანამდებობიდან თავად გადადგა, მოგვიანებით კი, გაუჩინარდა. ყოფილი პროკურორის ძებნა პოლიციამ მას შემდეგ დაიწყო, რაც ოჯახმა მისი უსაფრთხოების გამო განგაში ატეხა.
სამართალდამცველებმა იიფათ ტომერ-იერუშალმის მანქანა თელ-ავივის სანაპიროსთან იპოვეს. როგორც ეროვნული უსაფრთხოების მინისტრი, იტამარ ბენ-გვირი ამბობს, ყოფილი სამხედრო პროკურორი კვირა ღამით დააკავეს.
სასამართლოს დოკუმენტში წერია, რომ იგი თაღლითობის, ნდობის დარღვევისა და მართლმასჯულებისთვის ხელის შეშლის ბრალდებებითაა დაკავებული.
