უკრაინის პრეზიდენტი ვოლოდიმირ ზელენსკი აცხადებს, რომ რუსეთმა, შესაძლოა, მომავალ წელს ნატოს წინააღმდეგ სამხედრო აგრესია დაიწყოს.
მიუნხენის უსაფრთხოების კონფერენციამდე გამართულ ბრიფინგზე საუბრისას ვოლოდიმირ ზელენსკიმ თქვა, რომ მოსალოდნელია, თავდასხმა ბელარუსიდან დაიწყოს. მისივე განცხადებით, რუსეთი ბელარუსის მიმართულებაზე სიტუაციის გასამწვავებლად 15 დივიზიას და დაახლოებით 100 000-დან 150 000-მდე სამხედროს ამზადებს. ვოლოდიმირ ზელენსკიმ თქვა, რომ ევროპელი პოლიტიკოსები ჯერ კიდევ შეშფოთებულნი არიან ამერიკის შეერთებული შტატების ბოლოდროინდელ განცხადებებთან დაკავშირებით.
„სავარაუდოდ, ეს მოხდება ისევე როგორც 2022-ში. მათ შეუძლიათ პირდაპირ უკრაინას შეუტიონ, ან წავლენ პოლონეთზე, ან თუნდაც, ბალტიისპირეთის ქვეყნებზე. მე ვფიქრობ, ეს მისი აზრია. ვფიქრობ, იმის საფუძველზე, რაც მე მივიღე დაზვერვისგან, ცხადჰყოფს, რომ მომავალ წელს ის გეგმავს ომს ნატოს ქვეყნების წინააღმდეგ. ღმერთმა ქნას, ჩვენ შევაჩეროთ ეს გიჟი კაცი და არ გვქონდეს ომი არსად მსოფლიოში, არც ევროპაში. უნდა იცოდეთ, რომ მას მხოლოდ ამ ფრაზით ვერ შეაჩერებთ. დიახ, მან თქვა, რომ გაჩერდება. ეს საკმარისი არაა. და როგორ შევაჩეროთ ის? ჩვენთვის უსაფრთხოების გარანტიებით. მე ვთქვი, რომ კი, ჩვენ გვინდა ნატოში, მაგრამ მე არ მსურს უკრაინელების დატოვება უსაფრთხოების გარანტიების გარეშე, თუ დღეს არ გაგვაწევრებენ ალიანსში. თუ დღეს არ ვართ მზად ნატოში გაწევრებისთვის, კარგით, დაველოდებით. მაგრამ ჩვენ არ შეგვიძლია მხოლოდ ლოდინი. ვფიქრობ, ჩვენ ძალიან გვჭირდება შეხვედრა და მძლავრი მხარდაჭერის მიღება. ძალიან უცნაური იქნება, თუ ამერიკის შეერთებული შტატების პოლიტიკა რუსეთის სასარგებლოდ შეიცვლება“, – თქვა უკრაინის პრეზიდენტმა ვოლოდიმირ ზელენსკიმ.
14 თებერვალს მიუნხენში უსაფრთხოების კონფერენცია დაიწყო, რომელსაც მსოფლიოს სხვადასხვა ქვეყნის ლიდერები ესწრებიან. მათ შორისაა უკრაინის პრეზიდენტი, ვოლოდიმირ ზელენსკიც. ის გეგმავს შეხვედრებს აშშ-ის პოლიტიკურ ლიდერებთან.
