ევროკავშირი და აშშ შეთანხმდნენ, რომ გააკეთებენ ყველაფერს, რათა ჩინეთს არ ჰქონდეს გავლენა ახალი ტექნოლოგიებისა და მწვანე ენერგიის ბაზარზე.
თუმცა, მათი მიდგომები განსხვავებულია, ბრიუსელი, ვაშინგტონისგან განსხვავებით, უპირატესობას ანიჭებს, რისკებისგან დაიცვას თავი.
შეიძლება თუ არა ამერიკის საპრეზიდენტო არჩევნებმა შეცვალოს არსებული ვითარება?
„თუ ტრამპი მოვა ხელისუფლებაში, ჩვენ უნდა ველოდოთ უფრო მაღალ ტარიფებსა და მეტ სანქციას. შეეცდებიან, რომ მოკავშირეებს დაგვაშორონ. თუმცა არ მგონია, მათი მასშტაბები მნიშვნელოვნად აღემატებოდეს ჰარისის ადმინისტრაციის შესაძლებლობებს. ვფიქრობ, ორ პარტიას შორის იქნება კონსენსუსი იმის შესახებ, თუ რამდენად დიდი საფრთხეა ჩინეთი აშშ-სთვის“, – ამბობს „ევროპული პოლიტიკის კვლევების ცენტრის” მეცნიერი ცერენ ერგენცი.
„დემოკრატები” და „რესპუბლიკელები” გააგრძელებენ მსოფლიოს წამყვანი ეკონომიკის მქონე ქვეყანასთან ტექნოლოგიურ ბრძოლას, რათა ბაზრებზე კონტროლი მოიპოვონ. ექსპერტების აზრით, მათი მეთოდები განსხვავებული იქნება.
„ჰარისის პოლიტიკა, სავარაუდოდ, ითვალისწინებს იმის გაგრძელებას, რაც ბაიდენის დროს მოხდა. ეს გულისხმობს მეტ კოორდინაციას, ინფორმაციის გაცვლასა და პოლიტიკის მეტად მორგებას, რაც ერთი მხრივ, კარგია, თუმცა, მეორე მხრივ, შესაძლოა, უარყოფითი შედეგიც მოჰყვეს. დადებითია იმ თვალსაზრისით, რომ გყავთ ძალიან ახლო მოკავშირე, რომელთანაც შეგიძლიათ მუშაობა. თუმცა ჩვენ ასევე უკვე ვნახეთ რამდენიმე ეპიზოდი, როდესაც აშშ და ევროპა თანაბარი შესაძლებლობებისთვის იბრძოდნენ“, – განაცხადა კვლევის ლიდერმა RAND Europe-ში ფრანჩესკა გირეტმა.
ევროკავშირისთვის ჩინეთი სავაჭრო პარტნიორი და ამავე დროს კონკურენტია, ვაშინგტონი კი, პეკინს მხოლოდ კონკურენტად აღიქვამს.
ასე რომ, მიუხედავად იმისა, რომ აშშ ცდილობდა ჩინეთთან დაშორებას, ევროკავშირს არ სურს, შეწყვიტოს კავშირი აზიურ გიგანტთან, რადგან მათი მიწოდების ჯაჭვი ძალიან მჭიდროა.
თუმცა ევროპის ქვეყნები აპირებენ ჩინეთიდან შემოსულ ელექტრომობილებზე გადასახადი დააწესონ და დაიწყონ გამოძიება ჩინეთის მხრიდან მზის პანელების მწარმოებლებისთვის სუბსიდიების გაცემასთან დაკავშირებით.
