ბელგიის ნარკოდანაშაულთან ბრძოლის პირველი ეროვნული კომისარი ინე ვან ვიმერშმა ევრონიუსისთვის მიცემულ ინტერვიუში განაცხადა, რომ ევროკავშირმა უნდა გააძლიეროს წნეხი დაშიფრული შეტყობინებების მქონე პლატფორმებზე, რადგან ეს მომსახურება ნარკოტიკებით მოვაჭრეებს თავისი კრიმინალური საქმიანობის კოორდინირების საშუალებას აძლევს.
მარედ გვინ ჯონსი, ევრონიუსი: „დღეს ჩემი სტუმარია ბელგიის ნარკოდანაშაულთან ბრძოლის პირველი ეროვნული კომისარი ინე ვან ვიმერში. მან იმ დროს დაიკავა ეს თანამდებობა, როდესაც ნარკოტიკებთან დაკავშირებული საქმის გარჩევების გამო სროლები მოხდა ქვეყნის დედაქალაქ ბრიუსელში, ხოლო მთავარი პორტი ანტვერპენი კოკაინის ევროკავშირში გამშვებ ძირითად კარიბჭედ იქცა. აქ შემოტანილი ნარკოტიკი მხოლოდ ბელგიის ბაზარზე არ არის გათვლილი, მისი უმეტესობა უკანონო გზებით გადააქვთ ევროპის ქვეყნებში, რის გამოც ეს საკითხი მხოლოდ ბელგიის პრობლემა არ გახლავთ. მოგესალმებით ქალბატონო კომისარო. ჩვენ ბრიუსელში ვიმყოფებით, ქალაქში, რომლის ქუჩებშიც ისევე როგორც ბელგიის სიდიდით მეორე ქალაქ ანტვერპენში, ბოლო დროს ნარკოტიკებთან დაკავშირებულმა ძალადობამ იმატა. იღებს თუ არა ბელგიის მთავრობა ამ პრობლემის გადასაჭრელად საკმარის ზომებს?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი:„ყოველ შემთხვევაში სრულად აცნობიერებენ, რომ ეს პრობლემა სასწრაფოდ უნდა გადაიჭრას. ნარკოდანაშაულთან ბრძოლის ეროვნული კომისრის დანიშვნა და მისი სააგენტოს შექმნა რა თქმა უნდა ძალიან მნიშვნელოვანი წინ გადადგმული ნაბიჯია, რათა შეიქმნას ეროვნული და თუნდაც საერთაშორისო სტრატეგია, რომელიც ამ დანაშაულის აღმოფხვრას მოემსახურება.“
მარედ გვინ ჯონსი, ევრონიუსი: „და ერთ-ერთი გამოსავალი, რომელსაც ახალი მთავრობა გვთავაზობს, არის ბელგიელი ჯარისკაცების ქუჩებში გამოყვანა მომავალი წლის აპრილიდან. თქვენ ეთანხმებით ამ ნაბიჯს? მის ირგვლივ ბევრს კამათობენ.“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „ყოველ შემთხვევაში ეს ერთ-ერთია იმ მრავალ ღონისძიებას შორის, რომლებიც მიიღეს. ჩვენთვის მხოლოდ უშუალოდ დანაშაულის აღკვეთა კი არ არის მნიშვნელოვანი, არამედ განმეორების პრევენცია და მისი გამომწვევი მიზეზების აღმოფხვრაც. ეს მეთოდოლოგია გაერთიანებული სამეფოსგან გადმოვიღეთ. ჩემი აზრით, მნიშვნელოვანია, რომ მის პირველ ანუ აღკვეთის ფაზაში, ისევ გავიდეთ ქუჩები და მოქალაქეებს დავანახოთ, რომ მთავრობა მათ გვერდით დგას, რომ მზადყოფნაში ვართ და ვითარებას ვაკონტროლებთ. რასაკვირველია, არ უნდა ველოდოთ, რომ ქუჩებში გასული სამხედროები ამოძირკვავენ ამ პრობლემის მიზეზებს. ვიცით, რომ უნდა ჩამოვაყალიბოთ საგანმანათლებლო და სიღარიბის აღმოფხვრის პოლიტიკა…ხალხი სამსახურში უნდა დავაბრუნოთ.“
მარედ გვინ ჯონსი, ევრონიუსი: „მინდა დავაზუსტო – ეს ხომ არ ნიშნავს, რომ ქალაქის ზოგიერთ უბანში დაკარგეთ კონტროლი?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „ზოგიერთს აქვს განცდა, რომ გარკვეულწილად კონტორლი დაიკარგა, მაგრამ ასე არ არის. პოლიცია და მაგისტრატები მუშაობენ ამაზე, თუმცა ვერც იმას ვიტყვით, რომ ეს უარყოფითად არ აისახა ამ უბნებში მცხოვრები ხალხს უსაფრთხოებისა და დაცულობის განცდაზე.“
მარედ გვინ ჯონსი, ევრონიუსი: „ქალაქ ანტვერპენში გამომძიებელმა მოსამართლემ ცოტა ხნის წინ – ოქტომბერში – განაცხადა, რომ ბელგია ნარკოსახელმწიფოდ იქცა. ეთანხმებით?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „მან სინამდვილეში ის თქვა, რომ ბელგია არ უნდა გადაიქცეს ნარკოსახელმწიფოდო და ვფიქრობ, ეს ძალიან მნიშვნელოვანი განსხვავებაა. ჩვენ არ ვართ ნარკოსახელმწიფო, მაგრამ ნამდვილად უნდა ვიმოქმედოთ, რომ მართლაც არ გავხდეთ ნარკოსახელმწიფო, რადგან ცოტა ხნის წინ ევროპოლმაც აღნიშნა, რომ კორუფციაა მთავარი პრობლემა. ამ კრიმინალურ სამყაროში ძალიან დიდი ფული ტრიალებს და სწორედ ამ ფულის გამო გადაწყვიტა ხალხმა კრიმინალებთან თანამშრომლობა და თუ ამ ბიზნესმოდელს არ დავშლით, ნამდვილად დავდგებით ნარკოსახელმწიფოდ ქცევის დიდი საფრთხის წინაშე.”
მარედ გვინ ჯონსი, ევრონიუსი: „ის გამომძიებელი მოსამართლე, რომელმაც ასე გაგვაფრთხილა, იძულებული გახდა დამალულიყო. საფრთხე შეექმნა იუსტიციის ყოფილ მინისტრსაც, რომელიც ამ ბანდებსა და სტრუქტურებს ებრძოდა. თქვენ უსაფრთხოდ გრძნობთ თავს, როდესაც ამ საქმეს აკეთებს?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „იცით, ვერ ვიქნებით გულუბრყვილოები. ჩვენს წინაშე მდგარ მტერს არავითარი ფასეულობა და ეთიკური ნორმა არ გააჩნია. ამიტომ რასაკვირველია, უნდა ვაცნობიერებდეთ უსაფრთხოებასთან დაკავშირებით რისკები რომ არსებობს, თუმცა ამან ხელი არ უნდა შეგვიშალოს, რომ გავატაროთ ის პოლიტიკა, რაც აუცილებელია. ასე მგონია, რომ მართალია, ამ ორგანიზებულ დანაშაულს უამრავი სახე და ასპექტი აქვს, მაგრამ გული ერთი აქვს, ასე ვიტყოდი და ეს მიზიდულობის ცენტრი ნამდვილად ფულია. ეს არის კრიმინალური აქტივები. ამიტომ მიმაჩნია, რომ ისინი სწორედ იმიტომ ანერვიულდნენ, რომ მათ კრიმინალურ აქტივებზე ვამახვილებთ ყურადღებას, რადგან სწორედ ეს არის მათი საარსებო წყარო.“
მარედ გვინ ჯონსი, ევრონიუსი: „ რამდენიმე ძალიან რადიკალური წინადადებით გამოვიდა, მაგალითად, ამერიკის პრეზიდენტი დონალდ ტრამპი, კარიბის ზღვაში მცურავ ნავებთან დაკავშირებით. ამაზე აქაური ევროპული ხელისუფლებაც ხომ არ უნდა დაფიქრდეს?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „იცით, კოკაინის გადაზიდვა ძალიან კომპლექსური პრობლემაა და ჩვენც მხოლოდ კომპლექსური ზომები უნდა მივიღოთ პასუხად. უნდა ვიცოდეთ, თუ საით წავა ახალი მარშრუტი, რათა შევძლოთ დაბრკოლებების შექმნა ლოგისტიკური ჯაჭვის ყველა რგოლის მიმართულებით, რადგან თუკი დაარღვევ იმ ლოგისტიკურ ჯაჭვს, რომელსაც ისინი საკუთარი ბიზნესის გასამართად ბოროტად იყენებენ, მაშინ ნამდვილად შევუქმნით კრიმინალურ ორგანიზაციებს სერიოზულ სირთულეებს. ამ შემთხვევაში პროდუქტიც რომ შეცვალონ, მაგალითად კოკაინის ნაცვლად სინთეტიკური ნარკოტიკის საჭირო ქიმიური შენაერთების იმპორტზე რომ გადავიდნენ, ეს ყველაფერი მაინც ერთი და იგივე ლოგისტიკური ჯაჭვის გავლით უნდა შემოვიდეს.“
მარედ გვინ ჯონსი, ევრონიუსი: „ეს რომ შეძლოთ, სავარაუდოდ, საერთაშორისო თანამშრომლობა და ევროპელ პარტნიორებთან მუშაობა ძალიან მნიშვნელოვანია. ევროპულ დონეზე თანამშრომლობის გაფართოება ხომ არ გვჭირდება? რამდენად საკმარისად უჭერს მხარს ბრიუსელი ევროკავშირის ინსტიტუტებთან თანამშრომლობას?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „ჩვენ ძალიან მჭიდრო კონტაქტი გვაქვს ევროკომისიასთან, რა თქმა უნდა და ევროკავშირის სტრატეგიის მიმართულებითაც ვთანამშრომლობთ. მიგვაჩნია, რომ ეს გლობალური პრობლემაა. ეს საკითხი ერთდროულად უნდა გადავჭრათ როგორც გლობალურ, ისე ადგილობრივ დონეზე. თუმცა მეტი ძალისხმევა გვჭირდება, რომ ევროპულმა ინსტიტუტებმა ზეწოლა მოახდინონ იმ დიდ კომპანიებზე, რომლებიც თავისი დაშიფრული კომუნიკაციის ინსტრუმენტებს სთავაზობენ ჩვენს ბაზარს, რათა აიძულოს ისინი, რომ ითანამშრომლონ სამართალდამცველებთან. აი ამის გაკეთება გვჭირდება ევროპულ დონეზე. კიდევ ერთი საკითხია ”გემებისა და ნავსადგურების ობიექტების საერთაშორისო უშიშროების” ე.წ. ISPS კოდების დანერგვა. ეს მოიცავს უსაფრთხოების ზომებს, რომლებსაც პორტებში ტერორისტული თავდასხმების თავიდან აცილების მიზნით იღებენ. მაგრამ ისინი ორგანიზებულ დანაშაულზეც უნდა გავავრცელოთ. ყველა ეს ნაბიჯი ევროპულ დონეზე უნდა გადაიდგას და ვიცი, რომ ხალხი ნამდვილად მუშაობს ამაზე.“
მარედ გვინ ჯონსი, ევრონიუსი: „რას გულისხმობთ დაშიფრული კომუნიკაციის მომსახურებაში, Telegram-ის მსგავს პლატფორმებს?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „Telegram-ს, Signal-ს და ყველა ასეთ პლატფორმას, რომლებიც მხოლოდ კანონიერ კომუნიკაციას კი არ უწყობენ ხელს, არამედ უკანონოსაც. როგორც ვხედავთ, კრიმინალური ორგანიზაციები ბოროტად სარგებლობენ იმ ფაქტით, რომ ეს კომპანიები მაინცდამაინც დიდი სიხარულით არ თანამშრომლობენ სამართალდამცავებთან. და თუ ჩვენთვის მისაღები იქნება, რომ არსებობდეს ციფრული სივრცე, რომელშიც კრიმინალები თავისუფლად ისაუბრებენ ერთმანეთთან, მაშინ ჩვენ ნამდვილად დავკარგავთ თავისუფლებას საბოლოო ჯამში.“
მარედ გვინ ჯონსი, ევრონიუსი: „ვიცი, რომ თავადაც დედა ხართ და რომ ასევე იყავით არასრულწლოვანების პროკურორი. ამ ყველაფრის გამო ბავშვები დიდი რისკის ქვეშ არიან. ბელგიაში არსებული ვითარებიდან გამომდინარე, რა მიგაჩნიათ ყველაზე დიდ საფრთხედ ბავშვებისთვის, როგორც ნარკოტიკის მოხმარების, ისე კრიმინალური ბანდების მიერ მათი გადაბირების თვალსაზრისით და ა.შ.?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „ბავშვები რისკის ქვეშ არიან, რადგან ვხედავთ, რომ მათი ფსიქოლოგიური ჯანმრთელობა მართლაც პრობლემად იქცა. ამიტომ მიმაჩნია, რომ ფული უნდა ჩავდოთ იმაში, რომ აღვზარდოთ ფსიქიკურად ჯანმრთელი და ძლიერი ბავშვები. თუ მოვახერხებთ, რომ სკოლების, სპორტისა და მშობლების მეშვეობით გავზარდოთ მტკიცე ნებისყოფის მქონე თაობა, ისინი ნებისმიერ პრობლემას დაძლევენ და კრიმინალურ ორგანიზაციებში შესვლის ცდუნებასაც გაუძლებენ. მეორე მხრივ, ვერ ვიქნებით გულუბრყვილონი. პირადად მე, მაგალითად, ძალიან მადარდებს უკანონო ელექტრონული სიგარეტები. ჩვენს მიერ ამოღებული ელექტრონული სიგარეტებში ჩასადები უკანონო კაფსულებიდან ირკვევა, რომ მათი 80%-ზე მეტი სინთეტიკურ ოპიოდის შეიცავს, რომლებსაც სპეციფიკური სუნი და ფერი არ გააჩნიათ. კრიმინალური ორგანიზაციები კი ბოროტად იყენებენ ელექტრონული სიგარეტებით ვაჭრობის მთელ ლოგისტიკურ ქსელს.
ძალიან მიხარია, რომ ჯანდაცვის მინისტრმა მიიღო გადაწყვეტილება და ელექტრონული სიგარეტისთვის განკუთვნილი ეს სხვადასხვა გემო შიგთავსი, ალუბლის გემოთი მაგალითად, მალე აიკრძალება, რადგან კრიმინალური ორგანიზაციები მათი საშუალებით ძალიან პატარა ბავშვებს აპარებენ სინთეტიკურ ოპიოდებს. ასე რომ კარგად უნდა გვესმოდეს, რომ ამ ყველაფრის ბოროტად გამოყენება შეუძლიათ კრიმინალურ ორგანიზაციებს. იგივე ეხება სოციალურ მედიას. აუცილებლად უნდა ვიაქტიუროთ სოციალურ მედია-პლატფორმებზე და პრევენციული შინაარსის მქონე ინფორმაცია განვათავსოთ. ბრიუსელში უამრავი ახალგაზრდა ჩივის, რომ ვერ პოულობს სტუდენტურ სამსახურს, სადაც სტაჟირებას გაივლის. ნამდვილად მიმაჩნია, რომ ახალგაზრდებს უნდა მოვცეთ შანსი, რომ სკოლა დაამთავრონ. თუ ამას არ გავაკეთებთ, როგორც კერძო და საჯარო პარტნიორები, მაშინ ბრიუსელის მსგავს დიდ ქალაქებში კრიმინალური ორგანიზაციები შესთავაზებენ მათ კრიმინალურ კარიერას.“
მარედ გვინ ჯონსი, ევრონიუსი: „ ელექტრონული სიგარეტებით სინთეტიკური ნარკოტიკის მიღება ძალიან სერიოზული საკითხია. მაინც რა რისკების წინაშე დგანან ჩვენი ბავშვები?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „არსებობს რისკი იმისა, რომ ძალიან ადრეული ასაკიდან მიეჩვიონ ნარკოტიკს და მათი ტვინი აღარ განვითარდეს როგორც საჭიროა. ეს ძალიან სერიოზულ საფრთხეს უქმნის ჯანმრთელობას და ჩვენ უნდა დავიცვათ ბავშვები ამისგან იმ ზომებით, რომლებსაც გავატარებთ ლოგისტიკური ჯაჭვის ყველა იმ რგოლის მიმართ, რომელსაც სინთეტიკური ნარკოტიკისთვის იყენებენ. ჩვენ ვხედავთ, რომ ბელგია, ისევე როგორც ნიდერლანდები, სინთეტიკური ნარკოტიკს მნიშვნელოვან მწარმოებელ ქვეყნად იქცა, რომელთაც ძირითადად ჩინეთიდან და ინდოეთიდან შემოტანილი ქიმიური ნივთიერებებით ამზადებენ. მათ კანონიერი დანიშნულება აქვთ. ჩვენ ძალიან ძლიერი ნავთობქიმიური და ფარმაცევტული ინდუსტრიები გვაქვს, მაგრამ ამ ნივთიერებებს სხვები ბოროტად იყენებენ და სინთეტიკურ ნარკოტიკს ამზადებენ. ევროპამ იმაზეც უნდა იფიქროს, თუ როგორ აღკვეთოს ამ ქიმიური ნივთიერებების ჩვენს ტერიტორიაზე შემოტანა.“
მარედ გვინ ჯონსი, ევრონიუსი: „ ქალბატონო კომისარო, ჩვენ ვსაუბრობთ ისეთ სინთეტიკურ ნარკოტიკზე, როგორიც არის მაგალითად ფენტანილი, რომლის მოხმარებაც, როგორც ვხედავთ ელვის სისწრაფით გაიზარდა ამერიკის შეერთებულ შტატებსა და კანადაში. რამდენად გვაქვს იმუნიტეტი ამ პრობლემის მიმართ ბელგიაში, ზოგადად ევროპაში, ხომ არ არის მოსალოდნელი, რომ იგივე ვითარებაში აღმოვჩნდეთ, როგორიც დღეს ატლანტის ოკეანის გაღმაა?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „ჩვენ ძალიან მჭიდრო თანამშრომლობა გვაქვს ნარკოტიკების წინააღმდეგ ბრძოლის ადმინისტრაციასთან, მაგალითად, და საკითხავი ის კი არ არის, მოიხმარენ თუ არა ჩვენთან ფენტანილს, არამედ ის – თუ როდის დაიწყებენ მის მოხმარებას. დარწმუნებული ვარ, რომ ჩვენთან ფენტანილი სულ სხვა სახით შემოვა და არა ისე, როგორც ამერიკაშია, რადგან ჩვენი ჯანდაცვის სისტემა და ა.შ. სრულიად სხვაა. მაგრამ ჩვენ მიგვაჩნია, რომ კრიმინალურმა ორგანიზაციებმა შეიძლება ფენტანილი შეურიონ კოკაინს, მაგალითად, და შემდეგ ფენტანილმა დააჩქაროს ნარკოტიკზე დამოკიდებულება. ის ნარკოტიკის ხელახლა მოხმარების სურვილს უფრო სწრაფად აჩენს. ამიტომ ხალხი მეტ კოკაინს უფრო მოკლედ პერიოდში მოიხმარს. ეს დაახლოებით ისე მოქმედებს, როგორც დამატკბობელი კვებაში. ისინი ფენტანილს იმ ნარკოტიკებში ურევენ, რომლებსაც ევროპაში უკვე იყენებენ. ამიტომ გვესმის ევროპული ცნობიერების ამაღლების სისტემის მნიშვნელობა და ამიტომაც ვუჭერთ მხარს.“
მარედ გვინ ჯონსი, ევრონიუსი: „და ბოლოს, ჩვენი საუბრის დასასრულს მინდა გკითხოთ, ფენტანილს ამ გზით უკვე ხომ არ იყენებენ ბელგიაში?“
ინე ვან ვიმერში, ბელგიის ნარკოდანაშაულთან ბრძოლის ეროვნული კომისარი: „ბელგიაში ჯერ არა, მაგრამ, რა თქმა უნდა, მე მხოლოდ იმაზე დაყრდნობით შემიძლია ვისაუბრო, რასაც ვხედავთ. ყველაფერს კი, ცხადია, ვერ ვხედავთ. თუმცა ფენტანილი ჩვენ არ გვიქმნის ისეთ პრობლემას, როგორსაც ამერიკას. მაგრამ ნამდვილად შემოვა.“
ავტორი: მარედ გვინ ჯონსი
