საქართველოში რუსეთის შეიარაღებული ძალების შემოჭრიდან და 2008 წლის აგვისტოს ომის დაწყებიდან დღეს, 7 აგვისტოს, 16 წელი გავიდა.
ამ ომს საქართველოს 412 მოქალაქე შეეწირა, 1747 ადამიანი კი დაიჭრა. მათ შორის იყვნენ: სამოქალაქო პირები, ჟურნალისტები.
დე-ფაქტო რეჟიმების მიერ კონტროლირებადი ტერიტორიების გარდა რუსმა სამხედროებმა დაიკავეს ხეობები, დიდი ქალაქები და სოფლები საქართველოს სამ რეგიონში. რუსული ბომბების გამო საკუთარი სახლ-კარი და მიწა 130 ათასმა ადამიანმა დატოვა. ზოგი მოგვიანებით დაბრუნდა, თუმცა 30 ათასამდე კვლავ იძულებით გადაადგილებული პირია.
ომი 5 დღე გაგრძელდა, რის შემდეგაც საქართველომ დაკარგა კონტროლი კოდორის ხეობასა და ახალგორის რაიონზე. რუსეთმა სამხრეთ ოსეთი და აფხაზეთი დამოუკიდებელ ტერიტორიებად გამოაცხადა.
„მცოცავი ოკუპაცია“, ტერიტორიების მიტაცება და ადამიანების გატაცება დღემდე გრძელდება.
