მოსკოვის გარეუბანში, საკონცერტო დარბაზ „კროკუს სითი ჰოლში“, მიმდინარე ღონისძიების დამსწრეებს თავს დაესხნენ. ვრცელდება ცნობები დაღუპულებისა და დაშავებულების შესახებ. რუსული მედიის ცნობით, დაღუპულთა რიცხვი რამდენიმე ათეულია, დაშავებული კი 100-ზე მეტი.
რუსული მედია თვითმხილველებზე დაყრდნობით ავრცელებს შემთხვევის ამსახველ ვიდეო და ფოტომასალებს. სააგენტო „ტასი“ ავრცელებს ერთ-ერთი თვითმხილველის კომენტარსაც, რომელიც ამბობს, რომ შეიარაღებული პირები „კარგად გაწვრთნილისა და მომზადებულის“ შთაბეჭდილებას ტოვებდნენ. “ტელეგრამის” არხებზე ვრცელდება ინფორმაცია, რომ თავდამსხმელები AKM-ის სახის ცეცხლსასროლი იარაღითა და მოლოტოვის კოქტეილებით იყვნენ შეიარაღებულნი.
მომხდარის შესახებ განცხადება გაავრცელა მოსკოვის მერმაც. სერგეი სობიანინმა მომხდარს დიდი ტრაგედია უწოდა. შემთხვევის შესახებ გაცხადება კრემლში ჯერ არ გაუკეთებიათ.
