ევროპისა და აშშ-ის მიერ უკრაინისთვის შეთავაზებული გარანტიების ფარგლებში მშვიდობისმყოფელებს შეეძლებათ რუსულ ჯარებს დაუპირისპირდნენ. ამის თაობაზე გერმანიის კანცლერმა ფრიდრიხ მერცმა ZDF – თან ინტერვიუში განაცხადა, თუმცა დასძინა, რომ ეს ჯერჯერობით შორეული პერსპექტივაა, რადგან თავდაპირველად უკრაინაში ცეცხლი უნდა შეწყდეს.
როდესაც ინტერვიუერებმა კანცლერს ჰკითხეს დეტალები აშშ-ს მიერ ორშაბათს, 15 დეკემბერს, ბერლინში უკრაინის პრეზიდენტ ვოლოდიმირ ზელენსკისთან მოლაპარაკებების დროს შეთავაზებული შესაძლო უსაფრთხოების გარანტიების შესახებ, მერცმა განაცხადა, რომ გარანტორებს მოუწევთ რუსული ძალების მოგერიება, თუ ცეცხლის შეწყვეტის ნებისმიერი პირობა დაირღვევა.
„ჩვენ უზრუნველვყოფთ დემილიტარიზებულ ზონას მეომარ მხარეებს შორის, უფრო კონკრეტულად, ვიმოქმედებთ რუსეთის შეჭრისა და თავდასხმის წინააღმდეგ, მაგრამ ჯერ არ მივსულვართ იქამდე“, – თქვა მან.
მისივე თქმით, ის ფაქტი, რომ ამერიკელებმა ასეთი ვალდებულება აიღეს – დაიცვან უკრაინა ცეცხლის შეწყვეტის შემთხვევაში, ისე თითქოს ეს ნატოს ტერიტორია იყოს – ამერიკის შეერთებული შტატების შესანიშნავი ახალი პოზიციაა.
რუსეთი ჯერ არ დათანხმებულა ცეცხლის შეწყვეტის შეთანხმებას, რომელიც როგორც აშშ-მა, ასევე ევროპამ ნებისმიერი უსაფრთხოების გარანტიის წინაპირობად მიიჩნიეს. მოსკოვი ასევე არ დათანხმებულა სამშვიდობოების ყოფნას უკრაინის ტერიტორიაზე.
ფრიდრიხ მერცმა ინტერვიუში ამერიკის იზოლაციონისტურ პოლიტიკაზეც ისაუბრა და გამოთქვა ვარაუდი, რომ ასე გაგრძელება ნაკლებად სავარაუდოა.
