სამ დეკემბერს მოლდოვის პოლიციამ უკრაინის საზღვრიდან რამდენიმე კილომეტრში მდებარე დასახლებაში გამნაღმველთა ჯგუფი გაგზავნა. მათ მიიღეს შეტყობინება, რომ ერთ-ერთმა მცხოვრებმა მიწაზე დაშვებული დრონი, რომელიც სათამაშო ეგონა, სახლში წაიღო.
როდესაც პოლიცია დედაქალაქ კიშინეუდან ჩრდილოეთით დაახლოებით 100 კილომეტრში მდებარე სინჟერეის რაიონში, პეპენიში ჩავიდა, აღმოაჩინა, რომ ოთხი დღის წინ ნაპოვნი დრონი თითქმის სრულად იყო დაშლილი ნაწილებად.
პოლიციამ განაცხადა, რომ დრონი არ იყო აღჭურვილი ასაფეთქებელი ნივთიერებებით, შესაბამისად, არც საფრთხეს წარმოადგენდა, თუმცა მოსახლეობა გააფრთხილა, არ შეეხონ ჩამოვარდნილ დრონებს ან მსგავს ობიექტებს და არც მათი გადატანა სცადონ.
ხელისუფლებას არ დაუკონკრეტებია დრონის წარმომავლობა. მათი თქმით, ეს იყო გერბერას ტიპის დრონი, რომელიც ჩვეულებრივ იმპროვიზებული თავდასხმის ან თვალთვალისთვის გამოიყენება.
როგორც ცნობილია, რუსეთი ასეთ დრონებს უკრაინაში იყენებს. დრონის შესახებ პოლიციას პეპენის მერმა შეატყობინა.
2022 წელს რუსეთის მიერ უკრაინაში სრულმასშტაბიანი შეჭრის შემდეგ ეს ინციდენტი მოლდოვის ტერიტორიაზე საჰაერო სივრცის დარღვევისა და დრონების აღმოჩენის პირველი შემთხვევაა.
გასულ კვირას, უკრაინაზე რუსეთის თავდასხმების დროს, მოლდოვის საჰაერო სივრცე არაერთხელ დაარღვიეს უპილოტო საფრენმა აპარატებმა.
ფლორეშტის რაიონის სოფელში, სახლის სახურავზე ჩამოვარდნილი დრონიც კი აღმოაჩინეს.
ამ ინციდენტების გამო რუსეთის ელჩი საგარეო საქმეთა სამინისტროშიც დაიბარეს.
