საქართველოს გენერალური პროკურატურისა და სახელმწიფო უსაფრთხოების სამსახურის ერთობლივი გამოძიების ფარგლებში დაკავებულია სუსის ყოფილ უფროს გრიგოლ ლილუაშვილთან დაკავშირებული პირი ანდრია ლილუაშვილი.
გამოძიება მას ედავება სისხლის სამართლის კოდექსის 194-ე მუხლით გათვალისწინებული დანაშაულის ჩადენას, რაც გულისხმობს „განსაკუთრებით დიდი ოდენობით ფულის უკანონო ლეგალიზებას“ და სასჯელის სახედ და ზომად ითვალისწინებს პატიმრობას ვადით 9-დან 12 წლამდე:
„საქართველოს პროკურატურა და სახელმწიფო უსაფრთხოების სამსახური ინტენსიურად აგრძელებს გამოძიებას იმ პირების მიმართ, ვისთანაც, შესაძლოა, დანაშაულებრივ კავშირში იყო ანდრია ლილუაშვილი, როგორც [სსკ-ს 194-ე მუხლით], ისე საქართველოს სისხლის სამართლის კოდექსის 339-ე პრიმა მუხლით, რაც გულისხმობს „ზეგავლენით ვაჭრობას“. ასევე ორგანიზებულ დანაშაულებრივ საქმიანობაში ჩართული სხვა პირების გამოვლენისა და შესაბამისი სამართლებრივი პროცედურების გატარების მიზნით…“ – განაცხადა პროკურატურის საგამოძიებო ნაწილის უფროსის მოადგილემ ბექა კვიციანმა.
22 ოქტომბერს სუსის ანტიკორუფციული დეპარტამენტის უფროსმა განაცხადა, რომ უწყებამ დაკითხა ყოფილი პრემიერ-მინისტრი ირაკლი ღარიბაშვილი. მისივე განმარტებით, მან აღიარა წლების განმავლობაში უკანონო შემოსავლების მიღება.
