საქართველოში გერმანიის ელჩი პეტერ ფიშერი ეხმაურება პრემიერ-მინისტრ ირაკლი კობახიძის განცხადებას, რომლის თანახმადაც მან თქვა, რომ „არ შეიძლება 80 წლის შემდეგ ევროპაში გებელსისეული პროპაგანდა დაბრუნდეს“.
პლატფორმა X-ზე პეტერ ფიშერი წერს, რომ „გერმანია ეწინააღმდეგება ნაცისტურ გერმანიასთან დაკავშირებული ტერმინებისა და შედარებების გამოყენებას, რომლებიც ისტორიულად, პოლიტიკურად და მორალურად არასწორია“.
I repeat what I have said here before:🇩🇪 objects to use of terms & comparisons related to Nazi-Germany that are historically, politically & morally wrong because they demean the victims & raise false implications. pic.twitter.com/tFaCuFmJOf
— Peter Fischer (@Diplo_Peter) October 8, 2025
დიპლომატის განმარტებით, ასეთი ტერმინები და შედარებები „ცრუ შთაბეჭდილებებს ქმნის და აკნინებს ნაციზმის წინააღმდეგ დაღუპულთა ხსოვნას“.
8 ოქტომბერს მთავრობის ადმინისტრაციაში გამართულ ბრიფინგზე პრემიერ-მინისტრმა, ირაკლი კობახიძემ განაცხადა:
„ევროპა პანაცეა არ არის! ევროპა იყო ბატონი გებელსიც, რომელიც 40-იან წლებში ევროპის ყველაზე ძლიერ სახელმწიფოში მოღვაწეობდა – არ შეიძლება 40-იანი წლებიდან 80 წლის თავზე, ევროპაში გებელსისეული პროპაგანდა დაბრუნდეს… გებელსისეული პროპაგანდის გაგრძელებაა სამარცხვინო ტყუილები და განცხადებები, რასაც ევროპული ბიუროკრატიისგან ვისმენთ“.
