„ევროპელმა დიპლომატებმა ამ კვირაში რუსი ოფიციალური პირები გააფრთხილეს, რომ ნატო მზად არის, ძალის გამოყენებით უპასუხოს შემდგომში საჰაერო სივრცის დარღვევას, მათ შორის რუსული თვითმფრინავების ჩამოგდებით”, – წერს Bloomberg.
ბრიტანეთის, საფრანგეთისა და გერმანიის წარმომადგენლები შეშფოთდნენ მას შემდეგ, რაც გასულ კვირას რუსული გამანადგურებლები ესტონეთის საჰაერო სივრცეში შეიჭრნენ, – ინფორმაციას მოლაპარაკებებთან დაკავშირებული წყაროები ადასტურებენ. ევროპელი დიპლომატების შეფასებით, ინციდენტი წინასწარ განზრახული იყო, მიუხედავად იმისა, რომ მოსკოვი ამას უარყოფს.
ბოლო პერიოდში ნატოსა და რუსეთს შორის მზარდი დაძაბულობაა. რუსულმა დრონებმა დაარღვიეს პოლონეთის, რუმინეთისა და სავარაუდოდ დანიის საჰაერო სივრცე. 19 სექტემბერს ესტონეთმა რუსეთი სამი MiG-31 გამანადგურებლის მიერ საჰაერო სივრცის დარღვევაში დაადანაშაულა, რომლებიც ქვეყნის ცაში 12 წუთის განმავლობაში დაფრინავდნენ. სულ ახლახან კი, უნგრეთის სამხედრო ავიაციამ ბალტიის ზღვის თავზე ხუთი რუსული თვითმფრინავი ჩაჭრა.
გერმანიის მთავრობის წარმომადგენელმა დაადასტურა ეს ინფორმაცია და თქვა, რომ ევროპელმა ელჩებმა რუს კოლეგებს ერთმნიშვნელოვნად გადასცეს, საჰაერო სივრცის დარღვევა დაუყოვნებლივ შეწყდეს. გერმანიის კანცლერმა ფრიდრიხ მერცმა განაცხადა, რომ ის პარიზთან, ლონდონსა და ვარშავასთან მჭიდროდ კოორდინაციას უწევს და მხარს უჭერს „ყველა აუცილებელ ზომას“.
ნატოს მე-4 მუხლი, რომელიც შესაძლო საფრთხეებთან დაკავშირებით კონსულტაციებს ითვალისწინებს, ამ თვეში ორჯერ უკვე ამოქმედდა პოლონეთსა და ესტონეთში მომხდარი ინციდენტების გამო. დანია კი არ გამორიცხავს, რომ ანალოგიური პროცედურა თავადაც გამოიყენოს, რადგან კოპენჰაგენის აეროპორტში საჰაერო მიმოსვლის შეფერხების საქმეში რუსეთის შესაძლო კავშირს იძიებს.
მოსკოვმა დასავლეთის გაფრთხილებას პროტესტით უპასუხა. საფრანგეთში რუსეთის ელჩმა ალექსეი მეშკოვმა განაცხადა, რომ მოკავშირეთა საჰაერო სივრცეში რუსული თვითმფრინავის ჩამოგდების ნებისმიერი მცდელობა „ომად ჩაითვლებოდა“. საგარეო საქმეთა მინისტრმა სერგეი ლავროვმა კი ნატო და ევროკავშირი უკრაინის მხარდაჭერის გზით რუსეთთან ომის პროვოცირებაში დაადანაშაულა.
მოკავშირეების პოზიციას იზიარებს შეერთებული შტატებიც. პრეზიდენტმა დონალდ ტრამპმა განაცხადა, რომ ნატომ რუსული თვითმფრინავები უნდა ჩამოაგდოს, თუ ისინი ალიანსის წევრი ქვეყნების საჰაერო სივრცეს დაარღვევენ.
გამწვავებული რიტორიკის, რუსეთის შეჭრისა და სხვა პროვოკაციების ზრდის გამო დასავლეთში უფრო მეტად შფოთავენ მოსკოვთან ფართო მასშტაბის კონფრონტაციაზე.
