გაეროს გადაწყვეტილებით, „ჰამასის” დაჯგუფების წევრები 7 ოქტომბრის თავდასხმის დროს და მას შემდეგ ჩადენილი სექსუალური ძალადობის გამო სასამართლოს წინაშე უნდა წარდგნენ. ამის შესახებ Euronews-ის ექსკლუზიურ ინტერვიუში 7 ოქტომბრის დანაშაულის სამოქალაქო კომისიის დამფუძნებელმა და თავმჯდომარემ დოქტორმა კოჩავ ელკაიამ-ლევმა განაცხადა.
ივლისის დასაწყისში ისრაელის Dinah Project-მა გამოაქვეყნა ანგარიში, რომელიც დაფუძნებულია გადარჩენილებისა და მოწმეების ჩვენებებზე, ასევე სასამართლო ვიზუალურ და აუდიო მტკიცებულებებზე.
ანგარიშში ნათქვამია, რომ ის ეყრდნობა ათობით ჩვენებას, მათ შორის „ნოვას” მუსიკალურ ფესტივალზე გაუპატიურების მცდელობას გადარჩენილი პირების, 15 დაბრუნებული მძევლისა და 17 მოწმის ჩვენებას.
გაერთიანებულმა ერებმა ოფიციალურად აღიარა „ჰამასის” მიერ 7 ოქტომბრის და მის შემდეგ ჩადენილი სექსუალური დანაშაული და „ჰამასი” გაეროს შავ სიაში შეიყვანა. ამ სიაში შესული პირები და შეიარაღებული დაჯგუფებები პასუხისმგებელი არიან კონფლიქტის დროს სისტემატურ გაუპატიურებასა და სექსუალურ ძალადობაზე. შემდეგი ლოგიკური ნაბიჯი სისხლისსამართლებრივი დევნის დაწყებაა – აცხადებს ცნობილი ისრაელელი ექსპერტი Euronews-ისთვის მიცემულ ექსკლუზიურ ინტერვიუში.
„ეს აღიარება არ არის მხოლოდ დიპლომატიური მიღწევა, ეს არის პირდაპირი საყვედური ყველა იმ ადამიანისთვის, ვინც ცდილობდა ამ სისასტიკის უარყოფას, ან დაფარვას“, – განმარტავს დოქტორი კოჩავ ელკაიამ-ლევი.
ღაზაში აყვანილ მძევლებთან დაკავშირებულ ანგარიშში ნათქვამია, რომ „არსებობს მკაფიო და დამაჯერებელი ინფორმაცია და ფაქტები იმის შესახებ, რომ ღაზაში აყვანილი ზოგიერთი მძევალი ტყვეობაში ყოფნის დროს სხვადასხვა ფორმით სექსუალური ძალადობის მსხვერპლი გახდა“. ეს მოიცავდა ფიზიკურ სექსუალურ ძალადობას, იძულებით გაშიშვლებას, სიტყვიერ სექსუალურ შევიწროებასა და იძულებითი ქორწინების მუქარას.
„გაეროს ყველა დოკუმენტისა და დიპლომატიური განცხადების უკან დგას ქალი, რომელიც გააუპატიურეს, კაცი, რომელიც აწამეს, ოჯახი, რომელიც განადგურდა. თითოეული აღიარება შეიცავს მსხვერპლის ჩახშულ ხმას, რომლის ღირსებაც წარმოუდგენლად შეირყა“, – განმარტა ელკაიამ-ლევიმ.
„ახლა ისრაელი და საერთაშორისო საზოგადოება არა სიტყვებით, არამედ ქმედებებით შეფასდება: დაიწყებენ თუ არა ისინი სისხლისსამართლებრივ დევნას და შექმნიან თუ არა ერთობლივი პასუხისმგებლობის მექანიზმებს „ჰამასის” დაჯგუფების საწინააღმდეგოდ“, – ნათქვამია ინტერვიუში.
