ევროკავშირი მოუწოდებს საქართველოს ხელისუფლებას, დაუყოვნებლივ გააუქმოს გადაწყვეტილება, დამოუკიდებელი სამოქალაქო საზოგადოების ორგანიზაციების საბანკო ანგარიშების დაყადაღებასთან დაკავშირებით – ამის შესახებ სპეციალურ განცხადებას საქართველოში ევროკავშირის წარმომადგენლობა ავრცელებს.
დიპლომატიური უწყების მიერ გავრცელებულ წერილში აღნიშნულია, რომ
ეს არის მორიგი თავდასხმა ფუნდამენტურ უფლებებზე და პოლიტიკური დევნის აქტი. ევროკავშირის წარმომადგენლობის მიერ გავრცელებულ წერილში ასევე წერია, რომ საბანკო ანგარიშების დაყადაღება განსხვავებული აზრის ჩახშობასა და დასჯას ისახავს მიზნად.
„სამოქალაქო საზოგადოების ორგანიზაციები არ არიან სახელმწიფოს მტრები, არამედ დემოკრატიული პლურალიზმისა და ანგარიშვალდებულების საყრდენი. წლების განმავლობაში საქართველოს აქტიური სამოქალაქო საზოგადოება ქვეყნის ევროპული ინტეგრაციის მამოძრავებელი ძალა იყო, რასაც მისი მოქალაქეებისთვის ხელშესახები სარგებელი მოჰქონდა. ამ ორგანიზაციების მიზანში ამოღება ფუნდამენტურ დემოკრატიულ ღირებულებებს ეწინააღმდეგება და კანდიდატი ქვეყნისგან მოსალოდნელ ძირითად პრინციპებს უთხრის ძირს”, – წერია ევროკავშირის წარმომადგენლობის მიერ გავრცელებულ განცხადებაში.
დიპლომატიური უწყება ასევე დასძენს, რომ ევროკავშირი მტკიცედ უჭერს მხარს საქართველოს სამოქალაქო საზოგადოებას, „რომელიც ხელისუფლების მხრიდან მზარდი რეპრესიების მიუხედავად კვლავ ემსახურება მოქალაქეებს”.
