საქართველოს სახალხო დამცველი სპეციალურ განცხადებას ავრცელებს, რომელშიც საუბარია საზოგადოებრივ და პოლიტიკურ დისკურსში ქალებსა და არასრულწლოვანებთან დაკავშირებული სიძულვილის ენის გახშირებულ შემთხვევებზე.
ლევან იოსელიანი განმარტავს, რომ სიძულვილის ენის გამოყენება მიუღებელია, განსაკუთრებით მაშინ, როდესაც ეს რიტორიკა პირდაპირ ან ირიბად, ბავშვებს ეხება. ომბუსდსმენის განცხადებით, საზოგადოების თითოეული წევრის მხრიდან მნიშვნელოვანია ბავშვების უფლებების განუხრელი პატივისცემა.
„არასრულწლოვანების ან მათი ოჯახის წევრების პოლიტიკურ დისკუსიებში მონაწილეობა, მათ შორის, საჯარო სივრცესა თუ სოციალურ ქსელში, არ უნდა იქცეს ბავშვებისადმი დამამცირებელი, სტიგმატიზაციის ან სიძულვილის შემცველი შინაარსის გამავრცელებელი. საზოგადოების თითოეული წევრის მხრიდან, მნიშვნელოვანია, ბავშვების უფლებების განუხრელი პატივისცემა და განსაკუთრებული სიფრთხილე საჯარო გამოსვლებით არასრულწლოვანთა შესაძლო ზიანის თავის არიდების მიზნით“ – ნათქვამია ლევან იოსელიანის სპეციალურ განცხადებაში.
სახალხო დამცველი მოუწოდებს ყველა შესაბამის სუბიექტს განსაკუთრებით პოლიტიკური პარტიების წარმომადგენლებს, საჯარო პირებსა და ჟურნალისტებს, გამოიჩინონ მაღალი სტანდარტის პოლიტიკური და სოციალური პასუხისმგებლობა და თავი შეიკავონ არაეთიკური განცხადებებისგან.
ომბუდსმენმა ეს წერილი მას შემდეგ გამოაქვეყნა, რაც 28 აგვისტოს, ოპოზიციონერმა ლიდერმა, თამარ ჩერგოლეიშვილმა სოციალურ ქსელის რამდენიმე მომხმარებელთან დისკუსიისას, ამავე მომხმარებლების გვერდებზე განთავსებული არასრულწლოვანების ფოტოსურათები გამოიყენა, რასაც უხამსი კომენტარები დაურთო.
მალევე, ამას მწვავე კრიტიკა მოჰყვა საზოგადოების დიდი ნაწილის მხრიდან. მოგვიანებით პარტია „ფედერალისტების“ ლიდერმა სოციალურ ქსელშივე, ბოდიში მოიხადა. თამარ ჩერგოლეისვილის მხრიდან არასრულწლოვნების მიმართ უხამსი კომენტარების დაწერის გამო, ბოდიში ბოდიში მოიხადა პარტია „ფედერალისტების“ კიდევ ერთმა ლიდერმა, გიგა ბოკერიამ.
