ნორვეგიის საგარეო საქმეთა სამინისტრო ეხმიანება 7 არასამთავრობო ორგანიზაციის საბანკო ანგარიშების დაყადაღებას.
დიპლომატიური უწყება წერს, რომ ეს „საქართველოში დემოკრატიის რღვევისკენ გადადგმული კიდევ ერთი ნაბიჯია“.
ნორვეგიის საგარეო საქმეთა სამინისტროს განცხადებით, გადაწყვეტილება არის სერიოზული დარტყმა ყველა იმ მოქალაქისთვის, ვინც სარგებლობს ამ ორგანიზაციების მიერ გაწეული სხვადასხვა სერვისით.
თბილისის საქალაქო სასამართლომ, საქართველოს პროკურატურის მიმართვის საფუძველზე, 27 აგვისტოს დააყადაღა შვიდი არასამთავრობო ორგანიზაციის საბანკო ანგარიშები.
საგამოძიებო უწყებამ განცხადებაც გაავრცელა და თქვა, რომ საქმე აღძრულია „საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილებისა და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე“.
