7 არასამთავრობო ორგანიზაციის საბანკო ანგარიშების დაყადაღების შესახებ, საქართველოში დიდი ბრიტანეთის საელჩოს განცხადებას პარლამენტის თავმჯდომარე, შალვა პაპუაშვილი „ქართველი ხალხის მიმართ არამეგობრულს“ უწოდებს.
„ფეისბუკის“ ოფიციალურ გვერდზე პარლამენტის თავმჯდომარე წერს, რომ რამდენიმე კვირის წინ, დიდი ბრიტანეთის საელჩო ცდილობდა გამოცემა „ტაბულასა“ და „მომავლის აკადემიისთვის“ გრანტის გაცემას. ამ ორგანიზაციებს შალვა პაპუაშვილი „ექსტრემისტული დღის წესრიგის მქონესა“ და „რადიკალურ“ სუბიექტებს უწოდებს.
„ორივე შემთხვევაში, დაფინანსების მცდელობის საბაბი იყო, მათ მიერ, თითქოს, ადგილობრივ არჩევნებთან დაკავშირებით ჟურნალისტური მასალის მომზადება და არჩევნებზე დაკვირვება. ეს მაშინ, როცა ორივე სუბიექტის გაცხადებული მიზანი არჩევნების ჩაშლაა“, – წერს შალვა პაპუაშვილი.
„ქართული ოცნების“ ერთ-ერთი ლიდერის მტკიცებით, დიპლომატიური წარმომადგენლობის ნაბიჯმა „საზოგადოებაში გააჩინა ლეგიტიმური ეჭვი, რომ საელჩოს მიზანი, შესაძლოა, არჩევნების საბოტაჟის მიზნის მქონე პირთა ფინანსური გაძლიერება ყოფილიყო“.
შალვა პაპუაშვილი ამბობს, რომ მან მოუწოდა საელჩოს, საზოგადოებისთვის მიეწოდებინა ინფორმაცია, ვინ დააფინანსა დიპლომატიურმა წარმომადგენლობამ 2024 წლის საპარლამენტო არჩევნების პერიოდში
როგორც პარლამენტის თავმჯდომარე სოციალურ ქსელში წერს, ამ მოწოდების მიზანი „ეჭვების გაფანტვა“ და გამჭვირვალობა იყო, თუმცა, მისივე განცხადებით, საელჩომ „ქართული საზოგადოების კითხვები და წუხილები უპასუხოდ დატოვა“.
