„დემოკრატიული არჩევნების ევროპული პლატფორმა“ (EPDE) საქართველოს პროკურატურის მიერ, მისი წევრი ორგანიზაციის, „სამართლიანი არჩევნებისა და დემოკრატიის საერთაშორისო საზოგადოების“ (ISFED) ანგარიშების გაყინვას გმობს.
გავრცელებულ განცხადებაში ნათქვამია, რომ ეს მთავრობის მიერ სამოქალაქო საზოგადოების სიტემატური რეპრესიების საფრთხეს წარმოადგენს. მათივე თქმით, სამოქალაქო სექტორის ფუნდამენტურ უფლებებზე განხორციელებული თავდასხმა, ევროპის მხრიდან დაუყოვნებლივ, საჯარო რეგირებას მოითხოვს.
„აქტივების გაყინვა სცილდება სამართლებრივი შევიწროების ფარგლებს. ისეთი ორგანიზაცია, როგორიც არის „სამართლიანი არჩევნები“, დიდი ხანია ხელს უწყობენ არჩევნების ხელშეუხებლობასა და მოქალაქეთა უფლებების დაცვას საქართველოში. საქართველოს ხელისუფლების მიზანი ნათელია: ჩაახშოს ის დამოუკიდებელი ხმები, რომლებიც ხელისუფლებაში წარმომადგენელთა პასუხისმგებლობის საკითხს აყენებენ, განსაკუთრებით 2025 წლის 4 ოქტომბერს დაგეგმილი ადგილობრივი არჩევნების კონტექსტში.
ამ ჯგუფების გაჩუმების მცდელობა დარტყმას აყენებს ადამიანის ფუნდამენტურ თავისუფლებებს, მათ შორის თავისუფალი და მშვიდობიანი შეკრების უფლებას, რომელიც დაცულია ადამიანის უფლებათა ევროპული კონვენციის მე-11 მუხლით და გარანტირებულია საქართველოს კონსტიტუციის 21 და 22 მუხლებით“, – წერია EPDE-ს მიერ გავრცელებულ განცხადებაში.
ორგანიზაციის თანახმად, სამოქალაქო საზოგადოების შევიწროება წლების განმავლობაში მიმდინარე დემოკრატიული უკუსვლის ნაწილია, რომელიც 2024 წლის ოქტომბერში გამართული „არასრულყოფილი საპარლამენტო არჩევნებით დაგვირგვინდა“.
როგორც განცხადებაში ვკითხულობთ, ISFED-ი „ქართული ოცნების“ მიერ განხორციელებული რეპრესიების გამორჩეული სამიზნეა, თუმცა ამის მიუხედავად, იგი მუშაობას მაინც განაგრძობს.
„კიდევ ერთხელ ვიმეორებთ ჩვენს მოწოდებას, ევროკავშირის ლიდერებისა და ეროვნული მთავრობების მიმართ:
მოითხოვონ „ქართული ოცნების“ მთავრობისგან ახალი, თავისუფალი და სამართლიანი საპარლამენტო არჩევნების ჩატარება საერთაშორისო ზედამხედველობის ქვეშ.
საჯაროდ დაგმონ „ქართული ოცნების“ მთავრობის მიერ სამოქალაქო საზოგადოებისა და მისი ხალხის წინააღმდეგ განხორციელებული არაკონსტიტუციული და რეპრესიული ზომები.
დააწესონ მიზნობრივი სანქციები არჩევნების გაყალბებაში, ძალადობრივ რეპრესიებსა და სამოქალაქო საზოგადოების სიტემატურ რეპრესიებში პასუხისმგებელ თანამდებობის პირთა მიმართ, მათ შორის აქტივების გაყინვის და მოგზაურობის აკრძალვის სახით.
გაუწიონ სასწრაფო ფინანსური დახმარება საქართველოს სამოქალაქო საზოგადოების ორგანიზაციებსა და დამოუკიდებელ მედიას, რათა მათ შეძლოს საქმიანობის გაგრძელება, მთავრობის მხრიდან შევიწროების მიუხედავად.
შეაჩერონ ნებისმიერი არაჰუმანიტარული თანამშრომლობა საქართველოს სამთავრობო ინსტიტუტებთან, საქართველოს მოქალაქეების მხარდაჭერის შენარჩუნებით.
გზავნონ მაღალი დონის დიპლომატიური მისიები საქართველოში, მათ შორის ევროპარლამენტის წევრებისა და ეროვნული საპარლამენტო დელეგაციების ჩართულობით, რათა წარმოჩენილ იქნას საქართველოს სამოქალაქო საზოგადოებისა და დემოკრატიული ძალებისადმი მტკიცე მხარდაჭერა.
ეს ვიზიტები უნდა მოიცავდეს ოპოზიციურ პარტიებთან, სამოქალაქო საზოგადოების ორგანიზაციებთან და დამოუკიდებელ მედიასთან თანამშრომლობას“.
