მსახიობ ანდრო ჭიჭინაძის, იუმორისტ ონისე ცხადაძისა და აქციებისას დაკავებული კიდევ 9 დემონსტრანტის საქმეზე სასამართლომ დაცვის მხარის დასკვნით სიტყვებს მოუსმინა.
რეპლიკის უფლებით არ უსარგებლია ბრალდების მხარეს. ვაჟა თოდუა ვახტანგ ცალუღელაშვილი პროკურორები არიან პროევროპული დემონსტრაციებისას დაკავებული რვა პირის საქმეზეც. მათ არც ამ შემთხვევაში უსარგებლიათ რეპლიკის უფლებით. პროკურორებს არც პროცესის შემდეგ, მედიასთან გაუკეთებიათ კომენტარი.
სასამართლომ ბრალდებულთა საბოლოო სიტყვების მოსმენა დაიწყო. 29 აგვისტოს პროცესზე ამ უფლებით მხოლოდ რევაზ კიკნაძემ ისარგებლა. სასამართლო სხდომაზე ის 26 ივნისის შემდეგ პირველად დაუშვეს. ორი თვის წინ მოსამართლე ნინო გალუსტაშვილმა მას დარბაზი „სასამართლოს დაუმორჩილებლობის“ მიზეზით დაატოვებინა.
„ჩემი ბედი სრულიად უმიზეზოდ, თვეებია, ჩემ გარეშე წყდება. იმედია, მიზეზს გავიგებ, მაგრამ რაც არ არის როგორ გავიგებ? 9 თვეა, ტყვეობაში ვარ და ჯერ ვერ ამოვხსენი, რა მედება ბრალად. ე.წ. „მოწმეებს” ვუსმინე და ვერ მივხვდი, რა არის ჩემი დანაშაული… ერთადერთი დანაშაული, რაც 9 თვის წინ ჩავიდინე ის არის, რომ ამ ადამიანებს არ ვიცნობდი…
თქვენ არ იცით, რა ხალხი დაიჭირეთ. მაგალითად, გია ტერიშვილი. ზვიად გამსახურდიამ თქვა: „9 აპრილს დაღუპულთა სულები დაგვცქერიან ჩვენ და ხარობენ ზეციურ ნათელში” – გია ტერიშვილის ძმა შეეწირა ქვეყნის თავისუფლებას. დარწმუნებული ვარ ტერიშვილი დაგვცქერის, ამაყობს და ხარობს თავისი ძმით…
აქ არის ჯანო არჩაია, რომელთან რუსებთან უწევდა ბრძოლა. აქ არის ანდრო ჭიჭინაძე, რომელზე განათლებულიც არ მინახავს. მადლობა, რომ ეს ხალხი გამაცანით… ერთხელ რუსლან სივაკოვს ვკითხე, ალბათ, აქედან რომ გახვალ, გაიქცევი სხვა ქვეყანაში-მეთქი და მიპასუხა: „არა, საქართველო ისე მიყვარს, სხვაგან რა წამიყვანსო…” – ამონარიდი რევაზ კიკნაძის საბოლოო სიტყვიდან.
26 ივნისის შემდეგ სხდომას პირველად ესწრება ერთ-ერთი ბრალდებული რევაზ კიკნაძე. მაშინ მოსამართლე ნინო გალუსტაშვილმა ის დარბაზიდან, “სასამართლოს უპატივცემულობის” მიზეზით გააძევა.
მანამდე კი დასკვნითი სიტყვები წაიკითხეს სხვა ბრალდებულების – ონისე ცხადაძის, ვალერი თეთრაშვილის, ჯანო არჩაიასა და გურამ მირცხულავას უფლებადამცველებმა.
ყველა მათგანმა ყურადღება გაამახვილა ბრალდების მხარის მიერ წარმოდგენილ მტკიცებულებებსა და მოწმეთა ჩვენებებზე. ადვოკატების თქმით, ამ მტკიცებულებებით სახელმწიფო ბრალდებამ ვერ დაადასტურა დაკავებულთა ბრალეულობა „ჯგუფურ ძალადობაში მონაწილეობის” საქმეში.
დაცვის მხარე საუბრობს პოლიტიკურ მართლმსაჯულებაზე. მათი შეფასებით, სასამართლოში საქმის რვათვიანმა განხილვამ აჩვენა, რომ მართლმსაჯულების ორგანო არ მოქმედებს დამოუკიდებლად.
კერძოდ, ბრალდებულების – ჯანო არჩაიასა და გურამ მირცხულავას ადვოკატმა, ომარ ფურცელაძემ ახსენა პრემიერ-მინისტრის, ირაკლი კობახიძისა და „ქართული ოცნების” სხვა ლიდერების განცხადებები. მისი თქმით, სასამართლოში საქმის განხილვის პარალელურად, მმართველი პარტიის წარმომადგენლებმა „არაერთხელ დაარღვიეს დაკავებულთა უდანაშაულობის პრეზუმფცია”. ადვოკატის შეფასებით, ეს იყო “დისკრედიტაციის ორკესტრირებული კამპანია”:
„დასკვნითი სიტყვაში არა შესაძლებლობად, არამედ პირდაპირ ვალდებულებად მიმაჩნია, ვისაუბრო 28 ნოემბრიდან 5 დეკემბრის ჩათვლით განვითარებულ მოვლენებზე. მოგვიანებით კი 5 დეკემბრიდან 26 აგვისტომდე ბიჭების მიმართ ნაწარმოებ დისკრედიტაციის ორკესტრირებულ კამპანიაზე, რომელსაც სათავეში ედგა ირაკლი კობახიძე…
ირაკლი კობახიძე გახლავთ ადამიანი, რომელმაც, ჩემი დათვლით, მინიმუმ 23 შემთხვევაში თავს დაესხა პირდაპირ ბრალდებულებს, მიაყენა სიტყვიერი შეურაცხყოფა, მან დაარღვია უდანაშაულობის პრეზუმფცია…
სრულიად სახელმწიფო მანქანა ეწეოდა სასამართლოს დისკრედიტაციას ბოლო ხუთი თვის განმავლობაში და თქვენ ვერ გაბედეთ გამოგეთქვათ კრიტიკა ან, სულ მცირე, დისკომფორტი”, – მიმართა ადვოკატმა, ომარ ფურცელაძემ მოსამართლე ნინო გალუსტაშვილს.
ბრალდებულთა უფლებადამცველებმა მაგალითად არაერთხელ მოიყვანეს საქართველოს უზენაესი და საკონსტიტუციო სასამართლოების, ასევე ადამიანის უფლებათა ევროპული სასამართლოს განაჩენები მსგავს საქმეებთან დაკავშირებით.
მომდევნო პროცესი მოსამართლე ნინო გალუსტაშვილმა 3 სექტემბერს დანიშნა. სხდომა ბრალდებულთა საბოლოო სიტყვებით განახლდება. მოსალოდნელია, რომ მოსამართლე ამავე დღეს გამოიტანს განაჩენს.
მსახიობ ანდრო ჭიჭინაძეს, იუმორისტ ონისე ცხადაძესა და კიდევ 9 პირს პროკურატურა ჯგუფურ ძალადობაში მონაწილეობას ედავება. ბრალის დამტკიცების შემთხვევაში, მათ 4-დან 6 წლამდე თავისუფლების აღკვეთა ემუქრებათ.
