ათობით არასამთავრობო ორგანიზაცია სოლიდარობას და მხარდაჭერას უცხადებს იმ ორგანიზაციებს, რომელთა საბანკო ანგარიშები დააყადაღეს.
არასამთავრობოებს მიაჩნიათ, რომ ეს ნაბიჯი მიზნად ისახავს “საქართველოში განსხვავებული აზრისა და პროევროპული ჯგუფების სრულად განადგურებას”.
“ეს ყოველივე ეს ხდება მაშინ, როდესაც ივანიშვილის მთავრობას მიცემული აქვს კონკრეტული ვადა, აცნობონ ევროკავშირს, უნდათ თუ არა უვიზო მიმოსვლის შენარჩუნება ქართველი ხალხისთვის”, წერია განცხადებაში. ორგანიზაციებში მიაჩნიათ, რომ ხელისუფლების ინტერესებში არ შედის საქართველოს შეუნარჩუნდეს უვიზო მიმოსვლა.
“ქართული არასამთავრობო ორგანიზაციების, რომლებიც საქართველოს მოსახლეობის ინტერესების და უფლებების დაცვას ახორციელებენ, საქმიანობის უკანონოდ გამოცხადება მიუთითებს იმაზე, რომ “ოცნების” მთავრობის ერთ-ერთი მიზანი საქართველოს მოქალაქეების სახელმწიფოს სადამსჯელო ქმედებების წინააღმდეგ დახმარების გარეშე დატოვებაა. არასამთავრობო ორგანიზაციების საქმიანობის შეჩერებით ათასობით ადამიანი რჩება უფასო იურიდიული დახმარებისა და სხვა სერვისების გარეშე.
არასამთავრობო და მედია ორგანიზაციები ვდგავართ ჩვენი კოლეგების გვერდით, ვიზიარებთ რა ჩვენს საერთო სწრაფვას თავისუფალი, სამართლიანი და დემოკრატიული საქართველოსთვის”, -წერია განცხადებაში, რომელსაც 50-ზე მეტი ორგანიზაცია აწერს ხელს.
