27 აგვისტოს მოლდოვამ დამოუკიდებლობის დღე აღნიშნა. თუმცა როგორც ქვეყნის ლიდერი, მაია სანდუ ამბობს, ქვეყნის სუვერენიტეტს განმტკიცება კვლავაც სჭირდება.
საბჭოთა კავშირისგან დამოუკიდებლობის მოპოვების 34 წლისთავის აღსანიშნად მოწყობილ ღონისძიებაზე მოქალაქეებს პრეზიდენტმა მაია სანდუმ მიმართა. მან ისაუბრა იმ მნიშვნელოვან დღეზე, რომელიც ზუსტად ერთ თვეში, 28 სექტემბერს დადგება.
საპარლამენტო არჩევნები – ესაა, რისთვისაც ახლა მოლდოვა ემზადება და სწორედ ამ კენჭისყრის შედეგი გადაწყვეტს ქვეყნის საგარეო კურსს. მაია სანდუს თქმით, 28 სექტემბრამდე მოლდოვის დამოუკიდებლობა, სუვერენიტეტი და მშვიდობა სერიოზული კითხვის ნიშნის ქვეშაა.
ბოლო წლებში მოლდოვის ღიად პროევროპული კურსი მოსკოვში რისხვის მიზეზი გახდა. 2024 წლის 3 ნოემბერს, საპრეზიდენტო არჩევნების მეორე ტურში, მაია სანდუს გამარჯვების შემდეგ ქვეყანას რუსული დეზინფორმაცია და პროპაგანდა მოედო.
კრემლი მაია სანდუს „მოქმედებისა და სოლიდარობის პარტიას“ დეზინფორმაციის გავრცელებაში, ამომრჩევლის მოსყიდვასა და ქვეყნის დესტაბილიზაციაში სდებდა ბრალს. თუმცა ის მარტო არ არის და ზურგს ევროპელი ლიდერები უმაგრებენ.
27 აგვისტოს დედაქალაქ კიშინიოვში საფრანგეთის პრეზიდენტი, გერმანიის კანცლერი და პოლონეთის პრემიერ-მინისტრი ჩავიდნენ, რათა მხარი დაეჭირათ მაია სანდუს პროდასავლური პარტიისთვის და პრეზიდენტთან მოლაპარაკებები გაემართათ. მაია სანდუმ ლიდერებს მადლობა გადაუხადა და მათთან ერთად ქვეყანაში რუსული „ჰიბრიდული ომის“ მეთოდებზე ისაუბრა.
„თქვენი აქ ყოფნა არა მხოლოდ მოლდოველთა მხარდაჭერას აჩვენებს, არამედ იმასაც, რომ ევროპული პროექტი გრძელდება და ჩვენ ამ პროექტის ნაწილი ვართ. გვინდა ნათლად ვთქვათ: ევროპას ალტერნატივა არ აქვს და ევროკავშირის გარეშე მოლდოვა წარსულშია გაჭედილი. ამას მეზობელ ქვეყანაში ჩამოგდებული ყოველი ბომბის დროს ვგრძნობთ. რუსეთის მიერ უკრაინის წინააღმდეგ წარმოებული დაუნდობელი ომი ყოველდღიურად ადასტურებს, რომ ევროპა ნიშნავს თავისუფლებასა და მშვიდობას, ხოლო პუტინის რუსეთი – ომსა და სიკვდილს. მოლდოველებმა უკვე აირჩიეს სწორი მიმართულება: ევროპული გზა, მშვიდობის გზა, თუმცა ყველამ ვიცით, რომ დამოუკიდებლობა გარანტირებული არაა. ის ჩვენს არჩევანზეა დამოკიდებული. დღეს კი ჩვენი დამოუკიდებლობა, სუვერენიტეტი და მშვიდობა უფრო დიდი გამოცდის წინაშეა, ვიდრე ოდესმე. ცდილობენ ჩვენს არჩევნებში ჩარევას, უცხოური დაფინანსებას, დეზინფორმაციული კამპანიების წარმოებას, კიბერშეტევებს, დაფინანსებული საპროტესტო აქციების გამართვას, ეკლესიისა და ონლაინ პლატფორმების გამოყენებას ანტიევროპული გზავნილებისთვის, სიძულვილის გავრცელებას“, – აცხადებს მოლდოვას პრეზიდენტი, მაია სანდუ.
28 სექტემბრის არჩევნებზე, მოლდოველებს ბიულეტენში მხოლოდ ერთი პროევროპული პარტია – მაია სანდუს „მოქმედებისა და სოლიდარობის პარტია“ დახვდებათ. მოლდოვის პრეზიდენტი დარწმუნებულია, რომ რუსეთი საარჩევნო პროცესში აქტიურად ჩაერევა და ქვეყნის დესტაბილიზაციას შეეცდება. ამავეს ვარაუდობს გერმანიის კანცლერი, ფრიდრიხ მერციც იზიარებს.
„რუსეთი ყოველდღე დაუღალავად მუშაობს იმისთვის, რომ ზიანი მიაყენოს და ძირი გამოუთხაროს მოლდოვის თავისუფლებას, კეთილდღეობასა და მშვიდობას. მოახლოვებული საპარლამენტო არჩევნების ფონზე, დღე არ გადის რუსეთის მასიური ჰიბრიდული შეტევის გარეშე. მოლდოვის დემოკრატია სამიზნეშია, ყველა სივრცეში. თავისუფალი, ღია, ლიბერალური საზოგადოებაა სამიზნეში. სწორედ ამიტომ გეხმარებათ გერმანია და ევროპა. მხარს ვუჭერთ მოლდოვას, დეზინფორმაციისა და კიბერთავდასხმების წინააღმდეგ ბრძოლაში. ვეხმარებით მას მისივე უსაფრთხოების გაძლიერებით“, -აღნიშნა გერმანიის კანცლერმა, ფრიდრიხ მერცმა.
საფრანგეთის პრეზიდენტმა, ემანუელ მაკრონმა რუსული დეზინფორმაციის ცნობილ გზავნილებს უპასუხა და განაცხადა, რომ „ევროკავშირი საბჭოთა კავშირი არ არის“.
„თქვენი დედაქალაქიდან რამდენიმე ასეული კილომეტრის დაშორებით, რუსეთის აგრესიული ომის უკრაინის წინააღმდეგ კვლავ მძვინვარებს. ასევე, აუცილებელია გვახსოვდეს, რომ ევროპასთან ინტეგრაცია მოლდოვისთვის მშვიდობისა და კანონის უზენაესობის სასარგებლოდ გაკეთებული აშკარა არჩევანია. კრემლის პროპაგანდა გეუბნებათ, რომ ევროპელებს ომის გახანგრძლივება და ხალხების დაჩაგვრა სურთ. ეს ტყუილია. რუსეთისგან განსხვავებით, ევროკავშირი არავის ემუქრება და ყველას სუვერენიტეტს პატივს სცემს. ესაა კავშირი, სადაც თითოეული ქვეყანა გაწევრებას თავად, სუვერენულად წყვეტს. ესაა კეთილდღეობისა და მშვიდობის კავშირი. ევროკავშირი არანაირად არაა საბჭოთა კავშირი“, – აცხადებს საფრანგეთის პრეზიდენტი, ემანუელ მაკრონი.
2024 წლის ოქტომბერში, მოლდოვაში ჩატარებული რეფერენდუმის შედეგად, მცირე უპირატესობით, მოსახლეობამ ქვეყნის ევროკავშირში გაწევრებას დაუჭირა მხარი და მალევე, ბრიუსელმა კიშინიოვთან გაწევრებაზე მოლაპარაკებებიც გახსნა.
