ცენტრალური საარჩევნო კომისია მოქალაქეებს ამომრჩეველთა ერთიან სიაში მონაცემების გადამოწმებისკენ მოუწოდებს.
საარჩევნო ადმინისტრაციის პრესსპიკერის, ნათია იოსელიანის თქმით, ეს პროცედურა აუცილებელია, რათა ამომრჩევლებმა შეუფერხებლად და სრულფასოვნად შეძლონ კენჭისყრის პროცესში მონაწილეობა.
მისივე თქმით, ამომრჩეველთა ერთიან სიაში ცვლილებების შეტანის მოთხოვნა შესაძლებელი იქნება 16 სექტემბრის ჩათვლით.
საარჩევნო ადმინისტრაცია პროცედურებს ახსენებს რეგისტრაციიდან მოხსნილ, რეგისტრაცია ძალადაკარგულ და მისამართის მითითების გარეშე რეგისტრირებულ ამომრჩევლებსაც:
„გვინდა, მივმართოთ რეგისტრაციიდან მოხსნილ, რეგისტრაცია ძალადაკარგულ და მისამართის მითითების გარეშე რეგისტრირებულ ამომრჩევლებს, დროულად მიმართონ სახელმწიფო სერვისების განვითარების სააგენტოს მიმდინარე წლის 13 სექტემბრის ჩათვლით, გადაამოწმონ საკუთარი მონაცემები და, საჭიროების შემთხვევაში, გაიარონ შესაბამისი პროცედურები არჩევნებში მონაწილეობის მიზნით.
სხვა შემთხვევაში ამომრჩეველი, ამომრჩეველთა ერთიან სიაში შეიყვანება სააგენტოს მონაცემთა ელექტრონულ ბაზაში არსებული ბოლო რეგისტრაციის ადგილის ან ფაქტობრივი (დროებითი) საცხოვრებელი ადგილის მისამართის მიხედვით“ – თქვა საარჩევნო ადმინისტრაციის პრესსპიკერმა, ნათია იოსელიანმა.
ცესკო განმარტავს, რომ 4 ოქტომბრის ადგილობრივი თვითმმართველობის არჩევნებისთვის საქართველოს ცენტრალური ხელისუფლების მიერ კონტროლირებად ტერიტორიაზე 3051 საარჩევნო უბანი გაიხსნება, სადაც ელექტრონული ფორმატით კენჭისყრა 2284 უბანზე ჩატარდება.
