ყოველ ზაფხულს საერთაშორისო მუსიკალური ფესტივალის დამსახურებით აზერბაიჯანის მთის კურორტი გაბალა საერთაშორისო დონის სცენად იქცევა ხოლმე. და ამ სცენაზე ღია ცის ქვეშ ჯაზის, ოპერისა და საორკესტრო მუსიკის მსოფლიო ვარსკვლავები კავკასიონის ფონზე ატკბობენ მსმენელს თავისი ხელოვნებით.
კავკასიონის მაღალ მთებში ჩაფლულ კურორტ გაბალას ფრინველთა გალობის ნაცვლად მუსიკის ჰანგები აღვიძებს. ყოველი წლის ივლისში ერთი კვირით ეს მშვიდი კურორტი მსოფლიო ვარსკვლავების სცენად იქცევა ხოლმე. მოგესალმებით გაბალის მე-14 საერთაშორისო მუსიკალურ ფესტივალზე. 13 ქვეყნიდან ჩამოსულმა 500-ზე მეტმა ხელოვანმა მოიყარა წელს თავი აზერბაიჯანის ამ თვალწარმტაც ქალაქში, რათა 6 დღის განმავლობაში ჩატარებულ კონცერტებზე ერთმანეთი გაერთოთ სასიამოვნო მუსიკითა და საუბრით.
მაია ბარათაშვილი, თბილისის მერიის ბიგ-ბენდის სოლისტი:
„უნდა გამოგიტყდეთ, რომ გაბალის მთები შთაგაგონებს იყო ამაღლებული, გულღია, რადგან აქ შესანიშნავი ატმოსფერო სუფევს. ძალიან თბილი ხალხია და ჩვენც – ქართველები, თბილისის მერიის ბიგ ბენდი – ყოველთვის სიხარულით ჩამოვდივართ აქ, რათა ერთმანეთს ვაჩუქოთ სიყვარული და მონაწილეობა მივიღოთ დიდებული მუსიკის ზეიმში, რომელიც შთაგვაგონებს და აგვამაღლებს.“
აქ მთელი დღე მუსიკის ჰანგები ისმის, იქნება ეს დილის რეპეტიციები თუ საღამოს კონცერტები. როგორც კი მოსაღამოვდება, ამფითეატრი ღია საოპერო დარბაზად იქცევა. და აქედან გამოსული არიების ხმა მთიდან მონაბერი სიოს შრიალასა და მოპიკნიკეების ხმებს ერევა.
„უკვე მრავალი წელია ეს ფესტივალი ტრადიციულად აზერბაიჯანში ტარდება,“ – ამბობს ნურბენიზ მერდიევა, მაყურებელი. „მოვუსმინეთ ადგილობრივ და უცხოელ შემსრულებლებს და უზომოდ დიდი სიამოვნება მივიღეთ.“
გაბალის ღია სივრცეში ჩატარებული ფესტივალი გაცოცხლებულ ფერად ღია ბარათს ჰგავს, საიდანაც სიმებიანი საკრავებისა და სიმღერის ჰანგები იფრქვევა.
„ძალიან ამაყი ვარ, როცა გაბალაში ვარ,“ – ამბობს იუსიფ ეივაზოვი, ოპერის მომღერალი. „რადგან ეს ჩემი ქვეყანაა, განსაკუთრებული ადგილია. ამ ფესტივალს მისი დაარსების დღიდან მოვყვები და ეს გზა 14 წლის წინ დაიწყო. ეს ფესტივალი ჩემს თვალწინ განვითარდა, სულ უფრო მეტი უცხოელი და საერთაშორისო დონის ხელოვანი ჩამოდის. ეს ფესტივალი ყოველ წელს სულ უფრო მეტად იხვეწება.“
როდესაც სცენაზე ბოლო ნოტის ხმა მიწყდება, ის მთებში ექოდ გრძელდება. მუსიკოსები და აუდიტორია კი მომავალი წლის მუსიკალურ ფესტივალამდე დარჩენილი დღეების დათვლას იწყებენ.
ავტორი: ჩინზია რიცი
