„ვერ დააბრუნებთ საბჭოთა ტერორს“ – ამ ლოზუნგითა და მოძრაობა „300 ქალის” ორგანიზებით თბილისში საპროტესტო მსვლელობა გაიმართა. მოქალაქეები ფილარმონიასთან შეიკრიბნენ, მოგვიანებით კი, მსვლელობით პარლამენტისკენ გადაინაცვლეს.
ისინი სოლიდარობასა და მხარდაჭერას უცხადებენ „ბათუმელებისა“ და „ნეტგაზეთის“ დამფუძნებელს, მზია ამაღლობელს, რომლის საქმეზეც ბათუმის საქალაქო სასამართლოში განაჩენი ხვალ, 6 აგვისტოს, უნდა გამოცხადდეს; ასევე ნინო დათაშვილს – მასწავლებელს, რომელიც სასამართლოს მანდატურზე „თავდასხმის“ ბრალდებით არის დაკავებული. მას სასამართლოს განჩინებით იძულებითი ფსიქიატრიული ექსპერტიზა უნდა ჩაუტარდეს. ამას საპროტესტო აქციის მონაწილეები საბჭოთა რეპრესიულ პრაქტიკას ადარებენ.
„იმისთვის, რომ აქტიურ პროცესს ჩამოაშორონ და მისი სამოქალაქო პროტესტი ჩაახშონ, უნდათ, რომ ფსიქიატრიულ საავადმყოფოში გადაიყვანონ. ყველანაირი ზღვარი გადაილახა…
ხალხი აუცილებლად გავიმარჯვებთ. გაიმარჯვებს ჩვენი აბსოლუტურად ჭეშმარიტი სურვილი, რომ ჩვენი ქვეყანა დემოკრატიული იყოს. აუცილებლად გაიმარჯვებს კონკრეტულად მზია ამაღლობელი, რომელიც ყველა ჩვენგანის სინდისია, გაიმარჯვებს ნინო დათაშვილი და გაიმარჯვებს ყველა სინდისის პატიმარი“, – განაცხადა მოძრაობა „300 ქალის” წევრმა, თამარ მეუნარგიამ.
