დაპატიმრებული მასწავლებლისა და აქტივისტის, ნინო დათაშვილის მხარდასაჭერი საპროტესტო აქცია გაიმართა. 4 აგვისტოს აქციის მონაწილეები თავისუფლების მოედანზე შეიკრიბნენ.
საღამოს რვა საათზე, თავისუფლების მოედანზე შეკრების შემდეგ, ნინო დათაშვილის მხარდასაჭერი აქციის მონაწილეებმა წმინდა გიორგის მონუმენტს წრე შემოარტყეს და ცოცხალი ჯაჭვი შეკრეს.
მოგვიანებით კი რუსთაველის გამზირზე პარლამენტის წინ მიმდინარე საპროტესტო აქციას შეუერთდნენ.
თბილისის საქალაქო სასამართლოს მანდატურზე თავდასხმის ბრალდებით დაკავებული სამოქალაქო აქტივისტის, ნინო დათაშვილის წინასასამართლო სხდომა 7 აგვისტოსაა დანიშნული.
სასამართლოს განჩინებით, მას იძულებითი ფსიქიატრიული ექსპერტიზა უნდა ჩაუტარდეს. ნინო დათაშვილის ადვოკატი თამარ გაბოძე ამბობს, რომ დაკავებულმა აქტივისტმა მასთან საუბრისას 4 აგვისტოს კიდევ ერთხელ აღნიშნა, რომ წინააღმდეგია, მონაწილეობა მიიღოს იძულებით ფსიქიატრიულ ექსპერტიზაში.
რუსთავლის გამზირზე უწყვეტი საპროტესტო აქციები უკვე 250 დღეა, გრძელდება. აქციის მონაწილეები ხელახალი საპარლამენტო არჩევნების ჩანიშვნასა და საპროტესტო აქციებისას დაკავებულების გათავისუფლებას ითხოვენ.
