იაპონია ავსტრალიისთვის 6.5 მილიარდი დოლარის ოდენობის საბრძოლო გემებს დაამზადებს. მეორე მსოფლიო ომის შემდეგ ეს ტოკიოსთვის ყველაზე მასშტაბური სამხედრო კონტრაქტია, რომელიც კანბერისთვის 11 ფრეგატის აგებას მოიცავს.
საუბარია Mogami-ს კლასის იაპონურ სარაკეტო ფრეგატებზე. გემების მშენებლობაში კომპანია „მიცუბიში” ჩაერთვება, რადგან მთავრობის მიერ გამოცხადებულ ტენდერში სწორედ მან გაიმარჯვა. მისი კონკურენტი ამ პროცესში გერმანული კომპანია იყო. „მიცუბიში” ავსტრალიის სამეფო ფლოტისთვის 3 მრავალფუნქციური საბრძოლო გემის დამზადებას შეუდგება, დანარჩენი 8 კი ავსტრალიაში აშენდება.
„ჩვენი ურთიერთობები იაპონიასთან იზრდება და ძლიერდება. მსოფლიოში არ არსებობს ქვეყანა, რომელთანაც ამაზე დიდი სტრატეგიული მოკავშირეობა გვაკავშირებს. ეს კი აისახა ურთიერთობებზე თავდაცვის სექტორში. ეს გადაწყვეტილება ნაკარნახევია იმით, რომ მივიღოთ საუკეთესო პლატფორმა, საუკეთესო შესაძლებლობები ავსტრალიის სამეფო საზღვაო ფლოტისთვის. ამასთან ეს გადაწყვეტილება არის ავსტრალიასა და იაპონიას შორის ორმხრივ ურთიერთობაში ხელშესახები მომენტი”, – აღნიშნა რიჩარდ მაირლსმა, რომელსაც ავსტრალიაში თავდაცვის მინისტრის თანამდებობა აბარია.
ავსტრალია ამ გზით გეგმავს, დაიცვას უმნიშვნელოვანესი საზღვაო და სავაჭრო გზები ინდოეთისა და წყნარი ოკეანის პერიმეტრზე, სადაც ჩინეთის სამხედრო ყოფნა იზრდება. თავად იაპონიისთვის კი ეს კონტრაქტი საშუალებაა, რეგიონში ჩინეთის მზარდი გავლენის პირისპირ ახალი მოკავშირეობა გააძლიეროს. ამ დრომდე იაპონიის მთავარი უსაფრთხოებითი გარანტორი აშშ-ია.
„ველით, რომ კონტრაქტით გათვალისწინებული მიზნები მომავალი წლის დასაწყისშივე მიიღწევა. იმისათვის რომ ის დავასრულოთ, ვიმუშავებთ შესაბამის მხარეებთან, იქნება ეს კერძო თუ საჯარო სექტორი. თავად ეს ფაქტი არის ნდობის გამოხატულება იაპონიის მიმართ. ეს არის მნიშვნელოვანი ნაბიჯი წინ, რათა გავაძლიეროთ თანამშრომლობა ავსტრალიასთან, რომელიც ჩვენი სტრატეგიული პარტნიორია”, – თქვა იოშიმასა ჰაიაშიმ, იაპონიის მთავრობის წარმომადგენელმა.
