საპროტესტო აქციებისას დაკავებული გიორგი ახობაძის საქმეზე გადაწყვეტილებას მოსამართლე რომეო ტყეშელაშვილი ხვალ, 6 აგვისტოს გამოაცხადებს.
ნარკოდანაშაულში ბრალდებული ექიმის დასკვნითი სიტყვის მოსმენის შემდეგ მოსამართლემ განაჩენის გამოცხადება ჯერ 28 ივლისისთვის, შემდეგ კი უვადოდ გადადო.
25 ივლისის სხდომაზე გიორგი ახობაძემ სასამართლოს ვრცელი სიტყვით მიმართა. მან თქვა, რომ მისი სისხლის სამართლის საქმე „რევანში და შურისძიებაა“ და რომ ამაში პოლიციელები, პროკურორი და მოსამართლეები არიან ჩართული.
„მათ ჰგონიათ, რომ გვასამართლებენ, თუმცა სინამდვილეში საკუთარი თავისთვის გამოაქვთ განაჩენი… ციხით გვაშინებენ, მაგრამ ციხე არ არის საშიში. ჩემი ბრძოლა 20 კვადრატულ საკანში ვერ ეტევა და ეგაა დისკომფორტი“, – თქვა გიორგი ახობაძემ სასამართლო სხდომაზე.
მოსამართლე, რომელმაც გიორგი ახობაძის საქმეზე განაჩენი უნდა გამოაცხადოს, საქმეს 7 ივლისის სხდომიდან უძღვება. მან საქმე პრაქტიკულად განხილვის დასასრულს გადაიბარა მიხეილ ჯინჯოლიასგან.
გიორგი ახობაძეს პროკურატურა სისხლის სამართლის კოდექსის 260-ე მუხლის მე-6 ნაწილით გათვალისწინებულ დანაშაულს ედავება, რაც დიდი ოდენობით ნარკოტიკული საშუალებების უკანონო შეძენა-შენახვას გულისხმობს.
ექიმი ამბობს, რომ ნარკოტიკული საშუალება მას დაკავებისას ,,ჩაუდეს”. მისი თქმით, პოლიციელებმა მისი პირის ღრუდან ძალის გამოყენებით აიღეს ბიოლოგიური მასალა და ნარკოტიკული საშუალების პაკეტზე თავად დაიტანეს.
გიორგი ახობაძე 7 დეკემბერს რუსთაველზე გამართული საპროტესტო აქციიდან შინ მიმავალი დააკავეს. მას 8-დან 20-წლამდე ან უვადო პატიმრობა ემუქრება.
