ცენტრალური საარჩევნო კომისიის თანახმად, 2025 წლის 4 ოქტომბრის ადგილობრივი თვითმმართველობის არჩევნებისთვის ქვეყნის მასშტაბით, ოკუპირებული ტერიტორიების გარდა 3051 საარჩევნო უბანი გაიხსნება. მათგან 2284 უბანზე კენჭისყრა წარიმართება ელექტრონული ფორმით, დანარჩენ უბნებზე კი ტრადიციული ფორმით.
ცესკოს პრესსპიკერის, ნათია იოსელიანის თქმით, 5 აგვისტოდან ამოქმედდა საქართველოს საარჩევნო კანონმდებლობით გათვალისწინებული ყველა რეგულაცია:
„4 ოქტომბერს საქართველოს მოქალაქეები აირჩევენ 64 საკრებულოს 2 058 წევრს, როგორც პროპორციული, ისე მაჟორიტარული სისტემით და 64 მერს.
მუნიციპალიტეტის წარმომადგენლობითი ორგანოს არჩევნები, გარდა კანონით გათვალისწინებული შემთხვევებისა, ელექტრონული საშუალებების გამოყენებით ჩატარდება – ამომრჩეველთა თითქმის 90% საკუთარ არჩევანს ვერიფიკაციისა და ხმის მთვლელი აპარატების გამოყენებით გამოავლენს. ქვეყნის მასშტაბით სულ გაიხსნება 3051 საარჩევნო უბანი, რომელთაგან 2284 უბანზე კენჭისყრა ელექტრონული, ხოლო 767 უბანზე ტრადიციული წესით ჩატარდება.
საარჩევნო ადმინისტრაციამ უკვე დაიწყო კანონმდებლობით განსაზღვრული საარჩევნო პროცედურების განხორციელება. დღეიდან მოქმედებს ყველა ის საკანონმდებლო მოთხოვნა, დაშვება თუ აკრძალვა, რაც არჩევნების დანიშვნას უკავშირდება. ასევე დღეიდან ამოქმედდა წინასაარჩევნო კამპანიის (აგიტაციის) წარმოების წესები და საბიუჯეტო თანხების, თანამდებობრივი ან სამსახურებრივი მდგომარეობის გამოყენების აკრძალვასთან დაკავშირებული ნორმები”, – განაცხადა საარჩევნო ადმინისტრაციის პრესსპიკერმა ნათია იოსელიანმა.
ცესკო განმარტავს, რომ „იხელმძღვანელებს კანონის უზენაესობის, პოლიტიკური ნეიტრალიტეტისა და პროფესიონალიზმის პრინციპების დაცვით და საქმიანობას განახორციელებს ქცევის მაღალი ეთიკური სტანდარტებით”.
ბრიფინგამდე ცესკოში კომისიის სხდომა გაიმართა, სადაც საარჩევნო ღონისძიებათა გრაფიკი დამტკიცდა.
მიხეილ ყაველაშვილის განკარგულებით, ადგილობრივი თვითმმართველობის არჩევნები 4 ოქტომბერს გაიმართება. განკარგულებას ხელს აწერს პრემიერ-მინისტრი ირაკლი კობახიძეც.
კენჭისყრაში მონაწილეობის მსურველ პოლიტიკურ სუბიექტებს რეგისტრაციისთვის ვადა 8 აგვისტოს ჩათვლით აქვთ, კანდიდატების წარსადგენად კი – 4 სექტემბრის ჩათვლით.
