„სისხლით დავიჭერო, შემპირდა. 4-დან 7 წლამდე. პროკურატურაც მის სამსახურში ჩადგა, მაგრამ ამას მნიშვნელობა აღარ აქვს. სასამართლომ უნდა იმსჯელოს იმაზე, თუ რა სასჯელი მერგება… ეს განაჩენი მარტო ჩემი სასჯელი არ იქნება. ეს თქვენი სასჯელიც იქნება, ბატონო პროკურორებო. ყველა იმ პირის პროფესიული სასჯელი, რომელიც სახელმწიფოს მხრიდან ჩართული იყო ამ საქმეში“, – ბათუმის საქალაქო სასამართლოში გამართულ სხდომაზე მზია ამაღლობელმა დასკვნითი სიტყვა თქვა. ჟურნალისტის სისხლის სამართლის საქმეზე განაჩენს მოსამართლე ნინო სახელაშვილი 6 აგვისტოს გამოაცხადებს.
„4 აგვისტო მონიშნული მქონდა როგორ თარიღი, როცა ნინო დათაშვილის, სინდისის პატიმრის, მარტოხელა დედის აღკვეთის ღონისძიების შეცვლაზე უნდა ემსჯელა სასამართლოს. ისიც იმ დაწესებულებაშია, სადაც მე. თუმცა, ისეთ პირობებში ვართ, შემთხვევითაც ვერ გადავეყრებით ერთმანეთს…
მას შემდეგ, რაც გავიგე, რომ პროკურატურა ფსიქიატრიულში გამოკეტვას უპირებს, სულ ჩამოვიცალე. მიჭირს გავიხსენო, როდის იყო მორალისგან ასე დაცლილი სისტემა.
მერე გავიხსენე ნინოს სიტყვები, მე მსხვერპლი არ ვარო და ყველაფერი თავის ადგილზე დაბრუნდა. ნინო, რეჟიმი საკადრის პასუხს მიიღებს.
ბრაზისა და უსამართლობის გამო, ბატონო პროკურორებო, მეც ამიწყლიანდება ხოლმე თვალები, ენაც მებმება და სიტყვებს ვერ ვპოულობ, ხმაც მებზარება. რას იტყვით, საჭიროებს ეს ფსიქიატრიულ ექსპერტიზას? დათაშვილის ფაქტის გამო ბევრი სათქმელი უმნიშვნელო გახდა“, – განაცხადა მზია ამაღლობელმა.
მზია ამაღლობელმა თქვა ისიც, რომ პროკურატურის მიერ შემოთავაზებულ საპროცესო გარიგებას ხელს არ და ვერ მოაწერს.
„იქ, სადაც მეშვიდე თვეა, უკანონოდ ვარ გამოკეტილი, საპროცესო გარიგება ბევრისთვის სახელმწიფოს მხრიდან გადადგმული ჰუმანური ნაბიჯია. ვერ დავივიწყებ პატარა გოგოს ტირილს, რომლის ხმა ჩემს საკანში აღწევდა – დედა მენატრებაო. როცა გავიგე, რომ მის მშობელთან საპროცესო გარიგებას აწარმოებდნენ, ძალიან გამიხარდა.
ჩემს შემთხვევაში ასე არ არის, პირიქითაა. ცოცხლად დამარხვის ტოლფასია. შემოთავაზებაც კი ძალიან შეურაცხმყოფელია. ადვოკატებმა ჩემი პოზიცია უკვე გაახმოვანეს. არა, ვერ მოვაწერ ხელს ამ საპროცესო გარიგებას. იმ მარტივი მიზეზის გამო, რომ რაც მოხდა, არ იყო თავდასხმა. რა სამართალია ეს, არ ვიცი.
ჩემი დაპატიმრების პირველი დღიდან ამ სასამართლო დარბაზში არაერთგზის მკაფიოდ გამომიხატავს, რომ პასუხისმგებლობას არ გავურბივარ, განსხვავებით, ე.წ. დაზარალებული დგებუაძისგან. კანონში არსებობს ჩემი ქმედების, სილის გაწვნისთვის ადეკვატური მუხლი”, – თქვა ჟურნალისტმა.
ვიდრე ჟურნალისტი დასკვნით სიტყვას იტყოდა, ცნობილი გახდა, რომ ბოლო კვლევის თანახმად, მზია ამაღლობელის მხედველობის მდგომარეობა კიდევ უფრო გაუარესდა. ამის შესახებ ჟურნალისტის ადვოკატმა, მაია მწარიაშვილმა სხდომის დაწყებისას განაცხადა.
„ესაა ბოლო დღეების კვლევა … ერთ თვალში პრაქტიკულად არ არის მხედველობა და მეორე თვალში, სათვალის შემთხვევაში, მხოლოდ 30 პროცენტამდეა გაუმჯობესება შესაძლებელი“, – თქვა მაია მწარიაშვილმა სასამართლო პროცესზე.
ავტორიტეტიანი გამოცემების, „ბათუმელებისა“ და „ნეტგაზეთის“, დამფუძნებელი თითქმის შვიდი თვეა პატიმრობაშია. 14 ივლისის სხდომაზე სასამართლოსთვის ჩვენების მიცემისას მზია ამაღლობელმა კიდევ ერთხელ განაცხადა, რომ დაკავების შემდეგ იგი არაადამიანური მოპყრობის მსხვერპლი გახდა – ბათუმის პოლიციის უფროსმა, ირაკლი დგებუაძემ, რომელზე თავდასხმასაც ჟურნალისტს ედავებიან, მას სახეში შეაფურთხა, დაემუქრა და სიტყვიერი შეურაცხყოფა არაერთხელ მიაყენა.
ჟურნალისტს არაადამიანური მოპყრობის ფაქტზე დაზარალებულის სტატუსი ამ დრომდე არ აქვს. პროკურატურა საქმეს დღემდე არ იძიებს.
მზია ამაღლობელი დაკავებიდან 38 დღის განმავლობაში შიმშილობდა. ამასთან, მოგვიანებით საქმის ფარგლებში გამართულ ერთ-ერთ სასამართლო სხდომაზე ცნობილი გახდა, რომ პატიმრობაში მყოფ ჟურნალისტს მხედველობა სეროზულად დაუზიანდა.
„ბათუმელებისა“ და „ნეტგაზეთის“ დამფუძნებელს ირაკლი დგებუაძისთვის სილის გაწვნის გამო პოლიციელზე თავდასხმას ედავებიან. თუ ნინო სახელაშვილი მას დამნაშავედ ცნობს, ჟურნალისტს 4-დან 7 წლამდე პატიმრობა ემუქრება.
მასალა მომზადებულია გამოცემა „ბათუმელების” ინფორმაციაზე დაყრდნობით.
