ჩინეთის ჩრდილოეთ ნაწილში 70 წლის განმავლობაში ყველაზე ძლიერი წყალდიდობა მოხდა, მდინარე ჯუჰეს გასწვრივ 13 სოფელია დატბორილი. ათასობით ადგილობრივი და ტურისტი უკვე ევაკუირებულია.
როგორც ჩინეთის ხელისუფლება და სახელმწიფო მედიასაშუალებები იუწყებიან, ძლიერმა წვიმებმა და წყალდიდობამ ჩრდილოეთ ჩინეთში სულ მცირე 70 ადამიანის სიცოცხლე იმსხვერპლა, ათობით დაკარგულად ითვლება, საჭირო გახდა ასობით ათასი პირის ევაკუაცია.
„ეს წყალდიდობა ყველაზე მასშტაბურია, რაც იანჯჟუანგის წყალსაცავი აშენდა. მისი სიმაღლე წამში 2350 კუბურ მეტრს აღწევდა. ძლიერი წვიმის გამო იანჯჟუანგის წყალსაცავის ყველა თანამშრომელი 24 საათის განმავლობაში მორიგეობდა. წყლის მონიტორინგის ჯგუფი აკვირდებოდა კალაპოტში წყლის დონეს და შეგროვებულ ინფორმაციას აწვდიდა ჯიჯოუს რაიონის წყალდიდობის კონტროლის შტაბს“, – ამბობს ლი ჩუნჰუი, ინჟინერი.
ადგილობრივი ხელისუფლების წარმომადგენლების, მეხანძრეების, ჯარისკაცების, მოხალისეებისა და პროფესიონალი სამაშველო ჯგუფების დახმარებით, დაახლოებით 10 500 მცხოვრები შვიდ საგანგებო თავშესაფარში გადაიყვანეს.
ოფიციალური პირების თქმით, ჩინეთის მიმდებარედ, ჰებეის პროვინციაში, სინლოგონის ოლქში, უამინდობის გამო რვა ადამიანი დაიღუპა, 18 კი დაკარგულად ითვლება.
სახელმწიფო ტელევიზიის CCTV-ის ცნობით, სამაშველო ოპერაციები გრძელდება.
„სიააინში საკმაოდ მძიმე მდგომარეობაა. სოფელში ყველაზე მნიშვნელოვანი – ცინგნიანის ხიდი – წყალმა წაიღო. ჩვენი ყველაზე დიდი სირთულე იმ ხანდაზმული ადამიანების გადაყვანაა, რომლებსაც გადაადგილება უჭირთ. პოლიციის თანამშრომლების, საგზაო მოძრაობის მართვის დეპარტამენტისა და ჯარების მხარდაჭერით, ჩვენ შევძელით ამ ამოცანის შესრულება“, – ამბობს იანგ იონგი, ადგილობრივი მცხოვრები.
მაღალჩინოსნების თქმით, 300 კილომეტრის რადიუსზე პეკინსა და მის შემოგარენში წყალდიდობისა და მეწყრის შედეგად სულ მცირე 44 ადამიანი დაიღუპა, კიდევ ცხრა კი ამ დრომდე დაკარგულად ითვლება.
დაღუპულთაგან 31 ხანდაზმულია, რომლებიც პეკინის ჩრდილოეთით, მიუნის რაიონში, მოხუცებულთა თავშესაფარში იყვნენ ჩარჩენილი.
